同工合照│西北區聚會處聯絡電話｜光愛中心聯絡電話｜產品介紹｜聯絡我們

屯門執事室事件簿

【以下小記純粹個人分享，並不代表任何團體或組織。】

日期：九月十九日（星期三）

黎子鵬弟兄今晚就要飛去英國牛津攻讀博士學位，雖然識o左兩個月多ｄ，但係佢比我o既印像好深刻，為人謙厚穩重從來唔講ｄ誇大同埋認叻o既說話，滿有感情去關心弟兄姊妹，孝順父母全團弟兄姊妹都認同，唔說長道短從未聽過佢講灰心埋怨人o既說話，又肯去補位，使同工弟兄姊妹都好暢快好開心，今次一去唔知幾時先可以再見面，真係唔捨得。

日期：九月十八日（星期）

一返到o黎培哥就想我出下晝要用ｄ筆記同埋測驗，我o地又o羅份測驗做o下，我係第一部份全對，第二部錯四題，成績都算係咁啦！ ^_^ 。

日期：九月十七日（星期一）

前幾日係咁攪ｄ PowerPoint 都未有時間去處理「世界同工訓練中心（香港）」ｄo野，今日第一日開學，點名紙o個ｄ都未曾做起……，要快ｄ先得啦！

日期：九月十六日（星期日）

今朝五點鐘先攪掂，返o左屋企訓o左冇幾耐，有個弟弟九點幾打電話比我，話佢o黎唔到聚會，叫我通知其他弟兄……，其實我自己都出唔到聚會 ~~>_<~~。

日期：九月十五日（星期六）

我o地去o左屯門工業學院附近o既楊小坑公園度安靜，同埋幫子鵬攪歡送會。

因為志光哥哥星期六o個講已經講完，只係剩番星期日o個講，所以傍晚返執事室度又同爸爸一齊開工攪 PowerPoint 。其實志光哥哥要講乜都未知，最後只有數個點就照出街，比較高ｄ難度，通宵都係少不免。

日期：九月十四日（星期五）

爸爸做埋今星期月就唔做，所以培哥將佢ｄPower Point交o左比我做，加上９１１o個件事，志光哥哥仲未知要講ｄ乜，今晚成晚就係o係度上網搵ｄ有用o既資料。

日期：九月十三日（星期四）

世界同工訓練中心（香港）o係下星期一就開學啦！近排開始攪時表，佢o地分o左上下年度，每年度有十六週，而每星期有十節，佢o地一個星期要返四日學，都好唔簡單。

今晚我o地班大專弟兄o係荃灣度食飯小組，其實呢個月都幾高消費，不過可以一齊小組傾o下計都幾開心 ^_^。

日期：九月十二日（星期三）

今朝志光哥就打電話去紐約教會搵 Sugar 姐，睇睇佢o地情況點樣，感謝神一切都平安！

日期：九月十一日（星期二）

今日完o左祈禱會一睇電視，就望到美國世界貿易中心左右搖擺，後o黎問屋企人發生乜事，佢o地話好似睇電影咁，成o架飛機撞向世貿中心。之後係電視到睇到ｄ人係窗口到求救，冇幾耐連第二幢倒o左落o黎，都好得人驚，全場好大灰塵，ｄ人係咁走……。唔知紐約教會有冇事呢？

日期：九月十日（星期一）

今日請o左下晝假去佢科大度探個弟兄，呢次都係我第一次踏足科大，不過我唔係好識點去，最後搭車落元朗再去彩虹，再轉車入科大。裡面都幾大咁啦，佢帶我係入面兜o黎兜去四圍參觀都幾開心，我o地去到海邊，見到有人係度睇聖經，我諗係入面安靜都算係一個好地方。

日期：九月九日（星期日）

今日下晝去o左葵芳參加全港大專相聚，夜晚約o左 Tony 去聽 talk ，我同佢係佐敦附近，兜o黎兜去都搵唔到小巴去黃埔，最都比我o地搵到，去到o既時候已經太遲，不過我主要都係想同 Tony 傾o下偈，佢近o黎好似唔係好開心，但係佢都冇講過ｄ乜，願主成為佢心裡的力量同安慰。

日期：九月八日（星期六）

今朝一起身好累所以去唔到送玉燕機，願主恩陪伴佢啦！今朝去o左 Sunny 同埋 Esther o既婚禮，影完相立即返聚會處換衫，趕出去海洋公園，上次去o既時候只係行下ｄ海洋觀參觀下，因為太多人唔係好想隊咁耐隊玩機動遊戲，近o黎經常落雨，今次係海洋公園都唔算太多人，而且開放時間至夜晚十點左右，所以我o地差唔多樣樣都玩，我o地o左玩海盜船、過山車、越礦飛車、跳樓機……，越礦飛車有弟兄話好似海盜船同過山車o既合併版，第一次都有ｄ驚，第二次已經冇乜感覺，遲ｄ可能o羅手提一邊傾電話，一邊玩，跳樓機上升o既時候，都好驚o下，上到頂又冇乜o野，一落去就覺得 Free Fall 好舒服，成個人好似飄係半空，感覺好得意，返到屋企已經十二點幾。

日期：九月七日（星期五）

聽日要東九龍要講《神愛中國人》o既題目，今次o既手法比較特別ｄ，從中國o既文字入手，當中隱藏著神對中國人的熱愛，祂中國人祖先所敬拜的神。

聽日陳玉燕姊妹會同兩個姊妹去溫哥華讀訓練中心，今晚佢o地家族同佢攪歡送會，我又走o左食番餐 ^Q^ 。本來今晚要開通宵，不過我聽朝諗住去送機，同埋去觀禮，下晝要去海洋公園，所以今冇開通宵，只係做到十二點半就走o左。

日期：九月六日（星期四）

我o地大專家族開學後，弟兄第一次小組，就去o左葵芳度食飯，都幾開心o丫。

日期：九月五日（星期三）

近排唔知點解冇乜心機做o野，可能係o的電腦唔聽使，令到我o地好唔方便，而家要 scan 一ｄ對整 powerpoint 有關o既報紙同埋雜誌，求主叫ｄ機件生生性性啦。

日期：九月四日（星期二）

今日係巴基生日，本來約佢食晏，原來佢今日冇返工，同親戚去飲茶，咁樣我就同o左佢去飲o下o野同埋傾偈，現家香港呢個時世，真係叫人……，感謝親愛的主，不住帶領我o地向前走，以致我o地唔會好似世人咁樣失去方向同埋盼望。

日期：九月三日（星期一）

今日要出有ｄ有關感恩、讚美o既筆記，同埋繼續處理《約翰福音之靈修心得》。

日期：九月一日（星期六）

今日返屋企一訓就訓到下晝三點鐘先至醒，四點左右去聚會，原來何志行(George)今日轉o黎我o地家族 ^_^ ，我同佢係九三年已經認識，仲成為好親密o既同工，係轉團o既過程中，發生o左ｄ唔愉快o既事……，比我體會到要為大局放低自己的益處，往往會只會睇到自己的需要，忽略其他人的感受。主耶穌用o左個比喻講「誰是他的鄰舍」，最後那人明白就是「憐憫他的」，那裡出現四個人物，分別是一個落在強盜手裡的以色列人，一個祭司，一個利未人，一個撒瑪利亞人，按當時的情況以色人視同胞為兄弟，因為大家都是亞伯拉罕的後裔，而撒瑪利亞人是以色列人與外邦人所生的後裔，所以撒瑪利亞人是被離棄的族類，因此撒瑪利亞人與以色列人是沒有來往的。係呢個比喻，主以另一個角度去演譯鄰舍的關係，就是憐憫人的，不再是共同族類或住在你身邊的人。

日期：八月三十一日（星期五）

今日一班多時間o既弟兄姊妹去o左 Day Camp，而我上晝請假去o左送機，有大約廿個弟兄姊妹都去送機，我亦覺得有ｄ唔捨得，而那弟兄的爸爸目送佢入閘後，也不禁流下眼淚。

我返去執事室o既時候見到去 Day Camp o既弟兄姊妹都返到去，點知原來志光哥哥冇去到 Day Camp 係o度等我做o個份《聖經中的預言──盼望的人生》，志光哥哥都幾慘兩頭唔到岸，Day Camp 又冇去，o野又冇得做……，前幾日只做得半張紙，今日要做起七張紙都幾高難度，我同佢做到九點左右，爸爸好晏先返到o黎，佢仲慘要係一晚裡面做起，我做到朝早五點鐘就頂唔住，走o左出大堂ｄ凳到訓，而爸爸做到七點鐘出o黎叫醒我走。

日期：八月三十日（星期四）

聽日有個元朗o既弟弟會去多倫多讀書，我o地元朗o既弟兄姊妹同佢攪o左歡送會，佢當晚喊o左三次。另外，歡迎新轉入o黎o既弟兄李偉明（風聞係 City U 四大天王之一），因為佢係元朗o度教毅進課程。

日期：八月二十九日（星期三）

今日係梁文輝弟兄生日，我同佢去o左食早餐，原來佢同另一位以前同團o既弟兄同一日生日，所以我約埋何志行陪埋一個弟兄，同o個個弟兄係旺角食日本壽司慶祝一番。

日期：八月二十八日（星期二）

爸爸前日去o左行夜山挨病o左，今日病o左冇返工，我o地一班執事室同工，晏晝去o左食韓國燒烤自助餐，有兩位同事做埋八月就唔做，同埋士培哥係八月廿二日生日，所以出o黎食番餐。

日期：八月二十七日（星期一）

今日要處理《更美一程（一）》o既更新版筆記，同埋聚會安排o既筆記。

夜晚同家去o左

日期：八月二十六日（星期日）

今日生日，生日都唔算ｄ乜o野，因為我o地每日都係度長大緊，今日去o左愉翠園o個邊度安靜，我已經好耐未去過啦.....，諗番同弟兄姊妹好多歡樂的時光，真係飲人懷念，緊住同主許願，不過我也不覺得有甚麼特別，因為我每日都可以同主禱告許願，主每日都償還我o既禱告，所以對我來說，每天都是生日呢！

有人問我想要乜o野生日禮物，我想要的東西好簡單，但係又好高難度，就係當你地每次禱告的時候，求你記念我，就係咁簡單 ^^ 。

夜晚同家族同工ｄ弟兄姊妹，去o左酒樓食飯，好多謝佢o地請食飯，不過好唔知點咁，唔係太想佢o地使錢。

日期：八月二十五日（星期六）

我o地今日去o左嶺南o既 Common Room 度聚會，ｄ沙發好好玩 ^^ 。

日期：八月二十四日（星期五）

今日o羅o左部 Palm M100 去加 Ram ，２Ｍ Ram 真係唔夠使，裝o左套中文系統就冇晒位，所以加 Ram 都係事在必行。

琴晚先被人玩完「百萬富翁」，今晚又要同個弟兄諗呢方面o既題目，係聯族聚會度玩。

日期：八月二十三日（星期四）

又係繼續處理《靈修心得》一書。

夜晚家族ｄ弟兄同我o地攪生日會 ^^ ，ｄ姊妹真係好利害，食物o既水準可以比美高級餐廳，之後仲o羅我o地o黎玩「百萬富翁」 ^_^ ，呢個電視節目真係深入民心，而家仲深入教會o添！

日期：八月二十二日（星期三）

今日要將 Faith on Jornery 重新排版，諗住整得有系統ｄ。

晏晝專程去o左葵方同何志行弟兄食飯 ^^ ，佢比較忙ｄ，盼望係百忙中可以彼此支持。

日期：八月二十一日（星期二）

培哥諗住想 scan ｄ圖片係 Power Point 用不過，ｄ機又唔聽話，又用唔到 scanner 都唔知點算........

日期：八月二十日（星期一）

而家志光哥哥成日都 check e-mail ，不過近排ｄ機出現好多問題，一係上到 Internet ，就駁唔到內網，一係駁到內網，就上唔到 Internet ，好煩呀！~~~~

日期：八月十九日（星期日）

佢o地係水潭都游水，可惜冇帶游水裝備啦，不過o個度ｄ風景都好靚，琴成晚都冇乜點訓過，返去o既時候行到半路，有ｄ窒息同埋頭暈，緊住訓o左係路邊，個電話又收唔到，後o黎個弟兄係咁用條毛巾同我吹風。感謝主！冇乜事，不過行唔到咁快o者……可能前兩晚都冇乜點訓啦……

日期：八月十八日（星期六）

感謝主！終於係零晨一點攪掂ｄo野，我走o左去元朗度訓，因為有通宵小巴去果邊，今日可以搭 269C 去牛頭角，去到門口點知度門比人反鎖，原來有人係元朗宿營，跟住同個弟兄落街買宵夜比佢o地食，食完o野我就走o左去訓覺，點之班弟兄五點幾叫醒我去打籃球，真係比佢o地嚇死，我當然冇去到啦。朝早去o左元朗公園安靜，心裡好感動，體會父子聖靈為教會o既好熱心，係神保守o左教會。

係下晝我一點鐘去到牛頭角聚會地方，係果度行o黎行去睇o下弟兄姊妹預備興趣班o既情況，之後又走o左去咖啡店度飲咖啡，番返見到 Abby ，佢比o左張結婚比我 ^^ （好靚呀！）

三點鐘我要負責播 powerpoint 出事，志光哥開頭講o野五分鐘冇o野睇（好鑑尬），因為佢唔知我走o左去邊度，返到o黎執事室佢話想「鏈」死我喎 ^^ ，其實係當時係我埋唔到位o者……，不過氣氛好好，既輕鬆又感動，睇到ｄ人好投入聚會。

完o左聚會，我去o左尖沙咀度換o左部 Palm M100 ^^ 。

夜晚同個弟兄入大浪西灣，同元朗o既弟兄姊妹野營 ^^ 。

日期：八月十七日（星期五）

而家朝朝早都會同志光哥哥回覆ｄ e-mail ，遇到ｄ技術問題，唔點樣係 yahoo 度匯入地址，攪o左一陣先找到個方法，今晚又要開通宵啦.......

日期：八月十六日（星期四）

爸爸呢幾日放o左假去旅行，得番我係度攪ｄ Power point，同埋 scan ｄ相，不過部 scaner 又唔好聽使 >_< ......
今日有個弟弟生日，我同另個弟兄幫佢慶祝，佢買o左張咭，我買o左個蛋糕，雖然人小小不過都幾好啦！

日期：八月十五日（星期三）

今朝同個弟兄同屯門學生o既弟兄一齊，係聚會裡面體會主好愛教會，好想我o地同佢有深度o既認識，同埋認清佢就係榮耀o既神，弟兄姊妹要因主大有喜樂同盼望……。

日期：八月十四日（星期二）

今日同聽係新伊館度�m有特會，好開心又可以見到好多熟悉o既弟兄姊妹，今日第一個見到o既弟兄姊妹竟然係 Ruby ，佢o岩o岩係溫哥華返o黎冇耐。上晝我果團得我一個弟兄o黎，佢地都要返工，我同o左元朗o既弟兄一齊坐同埋食晏，夜晚約o左 Titus, Joe, Tony, Joshua 佢地食飯，唔少得去咖啡店度飲番杯 Ice Mocha ^^ 。

日期：八月十三日（星期一）

今日開始回覆弟兄姊妹，是否被取錄修讀香港訓練中心。

我平時帶飯個飯盒冇端端唔見o左，係唔係有ｄ弟兄姊妹有好大需食o左呢？不過下次食o左都留番個盒比我呀..... >_<

日期：八月十二日（星期日）

今日係聚會度見到刑啟志弟兄（又係叫 Thomas ），佢陪個新朋友去參加彩虹之旅，最後那個朋友表示接受主，我o地禱告完，子鵬教我o地學國際音標（International Phonetic Alphabet）我都好有興趣，原來我經常讀錯晒ｄ字都唔知，晚上同 Unique 家族弟兄姊妹去o左元朗度食o野，都幾開心 ^_^ 。

日期：八月十一日（星期六）

今日次第一次係呢個家族領詩，本來同個弟弟夾領詩，點知佢又唔想，變o左自己一個領，上次第一次帶遊戲，本來同另一個弟兄一齊，點知佢又唔得，又係剩係我一個帶，領完詩之後同個弟兄同工幫個弟弟傾計，由兩點傾到七點幾，傾到口水都乾埋。

日期：八月十日（星期五）

今日我都唔點解咁早返工，可能平時返開十點半啦，而家我製作緊一隻由ＭＤ轉去ＣＤO既詩歌碟，不過Ｄ音質始終有Ｄ沙沙地。

日期：八月九日（星期四）

今日執事室又玩大風吹，不過今次係將ｄ雜物吹出去，執事室由貨倉再次變返辦工室 ^^ ，地方亦變得寬敞o左好多。

日期：八月八日（星期三）

執事事添置o左一部 All in one o既儀器可作傳真機、彩色影印機同埋素描器，為o左我o地 Power Point 可以有更多插圖同埋資料，面前將一ｄ有關主返o黎o既新聞 scan o左佢。

日期：八月七日（星期二）

今日本來約o左 Ruby 係牛頭角一齊見面同埋食飯，點知佢出唔到o黎，而我今日下午請假去上環同 Titus 去o左一間米線麵舖食o野，之後去o左中央圖書度安靜，果度環境都好好，只係唔唱得詩歌o者，冇幾耐撞到ｄ深水埔弟兄。

晚上o既相聚取消o，最後o左同子鵬佢地係牛頭角聚會，完o左聚會後弟兄帶我去搭亡命小巴，小巴士司逢車過車，真係驚險，感謝主平安到步 ^^ 。

日期：八月六日（星期一）

朱漢忠（Tony）今日第一日返工，本來想同佢約埋 Titus 聽日一齊食晏o添！感謝主聽o左我o地o既禱告，使佢搵到份工，願主使佢能儘快適應工作環境。

日期：八月五日（星期日）

今日我地大專同文員係大興體育館度舉行籃球比賽，勝方當然係我o地大專啦！^^ 。

日期：八月四日（星期六）

今朝五點鐘收工，返屋企 -_- zzZZZ 。

今朝十一點鐘樓上裝修好噪呀~~~~~ 冇覺好訓 >_< 。

日期：八月三日（星期五）

爸爸買o左個新電話，好得意！當佢屋企打電話比佢o既時候，佢部電話就會發出佢個女把聲講「爸爸聽電話」，而家Ｄ科技真係日新月異，連電話鈴聲都可以錄音。

今晚例行工事，「開通宵」 -_- 。

日期：八月二日（星期四）

而家約翰福音概略已改為，約翰福音每天靈修心得，培哥算每個月出一本書的大計，好似唔係好掂，請弟兄姊妹多Ｄ為佢禱告啦！

日期：八月一日（星期三）

本來今晚約o左Ｄ弟兄燒o野食同埋行夜山，點知佢o地突然間唔得閒。我o黎我同 Joshua 一齊去o左深水埔睇室內無線電話。

日期：七月三十一日（星期二）

今晚有加開祈禱會，會講琴相聚o既內容，所以我今日要預備今晚用o既筆記。

日期：七月三十日（星期一）

今晚係葵芳有個全港團長相聚，不過我事前已約o左一班溫哥華團隊的弟兄姊妹相聚，Abby 係八月廿一日回溫哥華準備同 Peter Wong 結婚，所以我地約埋一齊開心o下。

日期：七月二十八日（星期六）

係三個月前元朗的弟兄姊妹用我o既名去申請水上活動，而果次又撞正打風，我o地改o左今日補番，所以我琴晚又返o左元朗聚會地方訓。今日陽光普照，所以我都晒到紅晒，我地個個都玩得好開心，彼此係度撥水，不過光耀就好慘，佢隻艇反o左，唔小心跌o左副眼鏡 >_< ，石沈大海執到執唔番。

之後我o地陪光耀去配眼，剛剛將軍澳弟兄姊妹o黎o左元朗聚會處宿營，我亦係街撞到 Joshua ^^

日期：七月二十七日（星期五）

今晚本來要同爸爸開夜車，不過我今晚又有相聚，聽日又要同元朗的弟兄姊妹去創興度扒艇仔，所以晚要爸爸自己車開啦

今晚係我o地辛亥年同屈弟兄姊妹相聚，陳玉燕姊妹會係九月去溫哥華參加o個個世界同工訓練中心，而洪家運弟兄、他的太太和仔仔，係星加坡返o黎，同埋李榮宗弟兄係七月三十日生日，故此相聚為佢o地慶祝一番。

日期：七月二十六日（星期四）

由於七月三十日係李榮宗弟兄的生日，今晚我同崔文法弟兄去o左旺角o個度，預備聽晚我o地同屈弟兄姊妹相聚o既禮物，唔覺唔覺佢o地大部份都結o左婚，有Ｄ仲生埋仔o添！

日期：七月二十五日（星期三）

今日有玉兔跳o黎香港附近，成日都掛八號風球，所以唔使返工，係屋企同文健傾電話，係呢次傾談中令我係觀念上有更新，平時我都喜歡送禮物比弟兄姊妹，我覺得如果要送就要將最好的比佢地無論係物質或者係屬靈的，今次使我明白到禮物可以係最好，但不一定要用錢買的，按聖經記載主耶穌一生沒有送任禮物（物件）給任何人，寶貴主選擇走卑微和貧窮的道路，主使犯罪的人得著赦免和平安，使痲瘋的得著痊癒和心靈的醫治，使瞎子能看見……，最後主身體獻上為祭，叫我們能與神和好，這實在是白白的恩典。

唔知 Jordan 同 Molly 走唔走得成呢？

日期：七月二十四日（星期二）

而家我o地執事室又多o左一樣新服務，就係租借棋類活動，士培哥每次去澳門都買好多玩具返o黎，今日佢係澳門返o黎又買o左好多玩具返o黎啦！

日期：七月二十三日（星期一）

依家逢星期一都係爸爸o既例假，所以佢要補番好多個鐘頭先掂，不過近排我o地加班通霄咁做牛頭角聚會用o既 Power Point ，我諗都夠佢補番晒Ｄ鐘o既 ^_^。

Jordan 同埋 Molly 今日上o黎執事室放低Ｄ貨，順便探o下我地o羅 ^^ ，o黎緊禮拜三佢o地會返去溫哥華。

日期：七月二十二日（星期日）

今日我o地家族得四個弟兄返聚會，有個病o左，有個去o左牛頭角聚會，子鵬去左渡蜜月，所以弟兄比較單薄Ｄ，感謝主聽o左我o地o既禱告，o黎緊有四五個弟兄會入大學，同埋轉埋過o黎。

日期：七月二十一日（星期六）

今日訓到下午兩點先至醒，仲要返執事室趕住通告，打錯晒Ｄ字都唔知道，今日亦係鍾旗峰爸爸出殯，心裡仍擔心佢唔知會點.....

日期：七月二十日（星期五）

今日又要去趕 Power Point Ｄo野，爸爸仲約定我今晚通霄，真係唔話得....，最後我地做到朝早六點鐘收工。

日期：七月十九日（星期四）

今日知道鍾旗峰弟兄的父親過了生的消息，令我好突然，亦令我好擔心同埋無奈，唔知點樣可以幫到佢 ....>_<.... ，我這刻可以做的就是為佢祈禱，求主施憐憫與佢，叫佢心靈能得著從主而來的安慰和支持。最後，我亦忍唔住打電話比佢......

今日亦都係 Jordan 同 Molly 係香港擺酒o既日子，我同小富子約埋去灣仔度行書展，今次都唔係好多書買，不過都買到我要買的書 ^^ ，之後約埋 Titus 係天星碼頭行過去，Joshua 比我o地先到一步到酒店，我o地約埋一齊入去，見番好多相識的弟兄姊妹，今次原來係 Billy 做伴郎，個個都盛裝出席，楊銓鐏弟兄充當今次o既司儀，成套中山裝咁 ^^ ，「百萬富翁」呢個節目，真係深入民心，連飲筵裡面都要整個「百萬老公」。

日期：七月十八日（星期三）

楊子雄弟兄今晚舉行安息聚會，少年團的弟兄姊妹亦執得好整齊去參加，據聞約有三百多個弟兄姊妹出席，子雄的親人見到咁o既場面都好感動，有Ｄ弟兄姊妹都係第一次負責呢類聚會，佢地都好落力咁去做好佢。

日期：七月十七日（星期二）

本悼念手冊出了些小風波，最後亦順利出版。

日期：七月十六日（星期一）

琴晚那弟兄的悼念冊尚未完成，佢o地又趕住出，最後又o黎執事室攪，一打開個檔案，發覺唔見了些資料，感謝主係六點終於完成o左啦！佢o地就o羅去印刷公司印。

日期：七月十五日（星期日）

今日係我o地家族娶老婆o既大喜日子，黎子鵬弟兄與劉淑卿姊妹結婚，弟兄姊妹都盛裝出席駕臨喜來登酒店，今次由我o地佈置場地，香港大學o既弟兄姊妹獻唱 Perhaps Love ，係李雪影姊妹（Shadow）指導底下，一切演出都好順利。

返到執事室又一大班弟兄姊妹係度趕工，就係趕住出楊子雄弟兄的悼念手冊，我幫他們一會就走了，因為已經好夜。

日期：七月十四日（星期六）

今朝五點鐘離開執事室，點知比爸爸推了上的士，先發覺自己沒有錢 >_< ，跟住叫司機車我去市中心，惟有將Ｄ散紙比晒佢，之後等到五點半o既頭班車返屋企。 -_- ..zzZZZ

日期：七月十三日（星期五）

今日係 Good Friday ？不過我同爸爸（鄭善業弟兄）係唔係好 Good 啦，要趕聽日牛頭角福音聚會要用o既 Power Point ，本來約o左黎子鵬佢o地係葵芳度採排，不過我地攪o左好耐，最後都冇去到採排。個 Scanner 又用唔到 >_<，我o地要上網搵圖片，仲攪到要開通霄，我已經好耐未開過夜車啦。

另外暑期西北大開發會舉行第二期，今晚亦出張海報，同埋o個Ｄ書簽，講開Ｄ書簽，真係慘！爸爸專登去買Ｄ噴墨專用雙面粉咭紙，點知o個Ｄ咭紙太粉個 Printer 上唔到紙，要人工上紙，但係左右邊界又對唔齊，攪到好煩，最後都係要搵彩色影印。

日期：七月十二日（星期四）

今晚黎文健同埋一班弟兄姊妹，係聚會處度排星期六福音會o既話劇，不過佢地今日狀態o麻o麻，唔係好入戲。佢地又冇白花油最後用左驅風油頂檔，後o黎都演得幾好o丫，願主使佢o地係o個日有好o既表現啦。佢o地仲攪o左巢窩。

日期：七月十一日（星期三）

今朝一早就比媽咪吵醒，去做o左搬運工人 ^^ ，我弟弟準備開一間電腦遊對戰中心，今日要將Ｄ電腦搬去舖頭。另外，有弟兄亦約o左我今朝同佢o地親近主，不過今日狀態欠佳，感到好倦，冇乜心機做o野。

子雄爸爸今天亦o黎到執事室，傾傾關於子雄o既安息聚會安排。

今晚去o左機場接洪家運弟兄，佢同埋佢o既太太同埋仔仔一齊係新加坡返o黎，我都好耐冇見過佢啦，佢個仔仔好趣緻o個名叫做洪謙明。今次佢返o黎主要係探親同埋幫佢個仔仔o羅身份證，預算逗留兩至三個月。

日期：七月十日（星期二）

昨晚屯門少年團楊子雄弟兄，已安息主懷，昨天有弟兄姊妹探望他，他說他感到一點累，叫弟兄姊妹回去，讓他休息。今天才發覺他已睡到主的愛懷，這令他的同工們都感到感觸。他約在半年前得知自己患了末期肝癌，他仍堅心的信任神，感謝主！他這樣的離去，使他家人亦感到安慰。

培哥部電腦壞o左，我o地又可以添置一部新電腦 ^^ 。

日期：七月九日（星期一）

今日去o左【亞薩的音樂村】度起番間屋仔，好得意呀！好似人o地玩大富翁咁，當你係o個度留言o既時候，Ｄ屋仔會越變越大，亞薩o個間已經變o左皇宮，仲有好多鄰舍 ^^ （得閒就留口信比我啦）。

日期：七月八日（星期日）

今日我o地屯門學生係聚會地方度攪o左個問答比賽，Ｄ題目出得好深，有好多都唔識答，仲有體能大比併，弟兄要做掌上壓，姊妹只係扭毛巾，最後，我o地得到第二名，獎品籃球一個 ^^ 。

日期：七月七日（星期六）

今朝仲諗住去創興度玩，不過個風仲唔捨得走，攪到我o地要改o左係廿八號先至去。

下午我臨時拉夫要係團契裡面帶遊戲，因為我個 Partner 有事o黎唔到，完左團契之後，我諗住去市中心買衫，突然間有長途電話急事，要同個弟兄去某姊妹屋企攪Ｄo野

日期：七月六日（星期五）

今朝掛八號風球唔使返工 ^^ ，不過掛到下午 1:40 就落番三號風球，Ｄ人紛紛趕住去返工，我都要返工，返到去只係 Update o下Ｄ通告，就收得工。

日期：七月五日（星期四）

今日掛起三號風球，原來前幾日o個颱風叫榴槤（係泰國改o既），而今次o個叫尤特，我o地係公司度等天文台掛八號風球等收工，亦上網留意颱風o既最新動向，志光哥哥預算今晚八點會掛八號風球，但係天文台係七點半已經掛o左。而教會通告我都唔知點做，真係史無前例係星期五掛八號，所以葵芳亦提早今日出通告，不過我收到e-mail已經要收工啦！ ^^ （天氣圖）。

日期：七月四日（星期三）

今日要處理一份名人格言，從中亦有Ｄ好幫到自己，例如：「當我o地遇到一Ｄ好難o既事，係因為我o地覺得好難禱告。」

日期：七月三日（星期二）

今晚係教會o既週年大會，我出o左去牛頭角聚會，本來諗住比番ｄo野人，不過因為走o既時候太趕，唔記得o左o羅，去到巴士站自己搭錯車都唔知道，上o左架 61X 就o黎到總站先發覺，之後 Tony 叫我搭 11B 去牛頭角，但係我又唔識落車，Titus 叫我係牛龍灣地鐵站o既下一個站落車，點知落o左車之後，我都唔知自己o既位置係邊度，打比佢o地又唔通（因為聚會熄電話o羅），唯有沿住地鐵路線行去牛頭角地鐵站，再去返聚會處。

去到冇幾耐就到 Jordan ，一見到就派炸彈 ^^ ，我同 Titus 同埋李銳基弟兄今個月要面臨經濟赤字，所以今次都好傷亡慘重 ^_^ 。另外黎子鵬弟兄結婚，我o地家族o既弟兄亦好隆重其事，紛紛要去買西裝、恤衫、西褲。

日期：七月二日（星期一）

今日我o地家族上午去o左嶺南o既多用途房裡面親近主，都幾正o丫有冷氣 ^^ ，不過我都係鍾意自己一個出去安靜，可以釋放ｄ去祈禱同埋唱詩 ^^ 。下午去o左飲茶同埋打波。

日期：七月一日（星期日）

今日係七日o既頭，o係記念主復活o既日子，亦係香港回歸祖國o既大日子，對於我亦係一個特別的日子，我係o係七月的某日裡信主，實際o既日期我都唔記得o左，所以我定o左七月一日為我信主週年 ^^。

今天掛起了三號風球，我與一些弟兄一齊唱o下歌，大家都有同感，原來打風使我o地可以放下一些工作，好好留在家中享受那份閑情，而我o地就一齊彼此分享唱詩歌的樂趣，感謝主使好多弟兄姊妹有作詩歌的恩賜，從詩歌的內容和音韻，我們彼此間同有一份共鳴，體會作者心靈與主經歷和體會。特意送首詩歌比你o地啦！心靈綠洲。

日期：六月三十日（星期六）

今日完o左聚會去o左葵芳，睇睇弟兄姊妹為黎子鵬弟兄感恩茶會o既採排，今次真係大陣象，要負責弟兄姊妹名單都有廿幾三十人，睇見呢個係家裡面弟兄姊妹o既恩情同埋義氣真係唔簡單。原來銓鐏都有份去獻詩唱 Perhaps Love，所以o係o個度都見到佢，唔知幾時佢會出個人大碟呢 ^_^ 。

日期：六月二十九日（星期五）

今日繼續入埋ｄ點名簿，已經處理青年、學生、成人團弟兄姊妹o既名單。

日期：六月二十八日（星期四）

份海報培哥唔想用相片，佢想要屋仔、地圖同埋聖經，所以今日要改o下個背景，出過張新o既海報。夜晚去o左嶺南度同弟兄們食飯。

日期：六月二十七日（星期三）

今日要出《世界同工訓練中心（香港）》o既海報。

日期：六月二十六日（星期二）

今日係文健正日生日，本來約o左佢去飲o下o野，但係落o左好大雨，我o地惟有係聚會地方附近食下午茶啦！而今日出埋《約翰福音拾珍》，同埋出埋今晚要用o既筆記。

日期：六月二十五日（星期一）

今日係端午節最o岩爬龍舟，不過龍舟就真係識爬，我o地就走爬艇仔啦！主o既亦冇離開我o地，當我o地準備要落水玩o既時候，突然間傾盤大雨，我o地落o左水之後，就只係陰天同埋有Ｄ微雨，唔使晒著o黎玩真係好o勒，我o地個個都玩得好開心！ ^^

日期：六月二十四日（星期日）

今日係歐效斌弟兄生日，不過我o地大專o岩o岩今日要入營，唔知佢今日點過呢？

真係要感謝主！昨天早上掛一號風球，晚上狂風大雨，仲有雷暴警告，但係今日下午入去創興水上活動中心o既時候，就唔同晒竟然陽光普照，好明顯係主出手啦 ^_^ ！直到扎營o既時候都好好天氣，當我o地扎好營o既時候就落起雨o黎，好寶貴我o地可以o係Ｄ有蓋o既地方燒o野食，主真係使萬事為我o地效力，燒完o野食就停o左雨，我o地就係草地玩遊戲，當我o地入去營地大堂相交o既時候，又落起雨o黎時間真係較得o岩o岩好，所以唔到你唔信，呢個世界真係有神o架 ^^ 。

日期：六月二十三日（星期六）

今日係第一次參加大專家族o既星期六聚會，o係聚會裡面原來係要做堂課都幾得意o丫。

六月二十六日係黎文健弟兄o既生日，我同埋黃杏強、鄧樹滔、廖國基（巴基喇噠），今晚同文健預祝生日，我o地去o左新元朗中心食晚飯，巴基仲送o左個玻璃蘋果比佢，呢個蘋果都好似係某劇集見過o下…… @_@ ，食完飯我o地仲想去行o下街，點知突然間落起狂風大雨，我o地變o左行百佳 >_< 。

日期：六月二十二日（星期五）

今日約o左黎子鵬同楊輝業去o左嶺南同個話信一齊打壁球，我真係好耐都冇做過運動，今日有咁o既表現簡直係神蹟，夜晚又同佢o地去o左個弟兄屋企食飯，由o個弟兄親自下廚，果然係有一手，我o地o個晚食紅米飯同埋飲淡豆槳，真係健康啦！

日期：六月二十一日（星期四）

唔知點解我o地收極好收唔齊o的筆記，真係激死志光哥哥，所以佢o地實行傳真過o黎簡單Ｄ。另外，志光哥哥突然間醒起要做 Power Point ，爸爸聽到都打o左個凸，距離七月初仲有唔係好多日子，真係要趕工先至掂，但爸爸又趕緊學校Ｄ project，真係多Ｄ為佢祈禱先得啦！

日期：六月二十日（星期三）

志光哥哥要想係牛頭角進行大測試，盼望聚會人數可以提升約六百人，所以近排不段係溫哥華o個邊o羅料，真係替o個邊o既弟兄姊妹慘，日日都比我o地 e-mail 追 call。

日期：六月十九日（星期二）

今日分區祈禱會，志光哥哥要出牛頭角聚會，下午佢突然要出筆記關於神對寄居者o既應許，又一節經節亦好深刻「不可欺壓寄居的，因為你們在埃及地作過寄居的，知道寄居的心。」（出廿三9）原來神亦好想透過係埃及地比佢o地識認寄居者o既心境，實在寄人籬下o既生活並非容易過，要面對新o既人事物同埋環境，已經唔簡單，仲要受人o既欺壓同埋白眼，真係苦不堪言，神要佢o地學習將心比心o既功課。其實經歷多一個難處，就可以體恤同明白多一類o既人。

亞 Ken o黎緊星期五就返溫哥華，所以今日中午我同亞 Joe（周永富）同亞 Ken 去飲茶聚一聚，飲飲下茶袁淑芳突然間打電話比我係溫哥華，仲要講埋Ｄ無關痛癢o既事，真係比佢嚇親。隔o左冇幾耐，我又同 Terence（李家驅）、Helen（張育燦）同埋亞 Ken 去o左食下午茶，o岩o岩食o左冇幾耐又要再食過，真係增肥有望啦！

日期：六月十八日（星期一）

今日要開始整一份西北區人名表，呢個都算幾大工程，西北區大約有 1700 人返聚會，而出席人數通常係總人數o既七成，即大約 2400 人左右啦，要今過星期起貨o既話都會比較困難Ｄ。

日期：六月十七日（星期日）

今日係父親節！亦係我正式轉o左去屯門大專家族o既日子，好開心可以係聚會度見番好多好熟悉o既面孔，又是另一個新o既開始 ^^ 。

日期：六月十六日（星期六）

今日係最後一日留係元朗聚會，轉眼間已經係度聚會o左十個月，心情緊係唔捨得啦，由其係一班同工（都係o個一句，地上無不散之筵席，永恆有永遠o既團聚，不過我o地始終都係弟兄姊妹o麻）。感謝主吸引o左大約十個新朋友參加聚會，佢o地玩得好投入，佢o地又玩得，又食得，真係掂！仲有幾個巴基斯坦藉o既小朋友o黎參加聚會，完o左聚會，佢o地教我o地講巴基斯坦話，真係好得意 ^^ 。有Ｄ完o左聚會又走去開檔──玩「橋牌」，一玩又玩到八九點。之後，我返弟兄房執埋Ｄ行李入箱搬返屋企。

日期：六月十五日（星期五）

今晚同一班大專o既弟兄姊妹去o左必勝客o個度，同個姊妹慶祝生日，個姊妹同埋一個弟兄星期五會去英國o既倫敦逗留三個月，之後我o地去o左市中心噴水池o個邊玩遊戲同埋開生日會 ^_^ 。

日期：六月十四日（星期四）

今晚本來有同工相聚，我去o左元朗先知道取消o左 >_<，鎮華因為太累返o左屋企，德源又約o左人，亞 Kim 見到佢o地唔o黎，又費時出o黎，不過都好，可以有番Ｄ時間自己去安靜o下 ^_^，近排好想學o下鋼琴，不過Ｄ手指好似好唔聽使咁，而今晚亦係最後一晚留係元朗雞地聚會處過夜，所以要執包袱。

日期：六月十三日（星期三）

中國有個西部大開發，而我o地西北區o黎緊會攪個「暑期西北大開發」，逢星期三會集結中五、中七及多時間o既弟兄姊妹，當日會有運動、親近主、追求、禱告、興趣班……，而我今日就係要處理呢張海報。

日期：六月十二日（星期二）

今天繼續處理約翰福音各章要點。

日期：六月十一日（星期一）

今朝 Terence 駛車接我去馬鞍山，呢次係佢第一次行呢條路，感謝主使佢冇行錯路，使我o地好順利地去到，仲同 Peter 一齊吃早餐。好快脆 Peter 咁就過o左兩個星期，之後 Terence 送 Peter 去機場。

日期：六月十日（星期日）

今朝去o左屯門o羅番Ｄo野比 Peter o羅返去溫哥華，所以遲o左去元朗聚會，完o左擘餅聚會，就出o左葵芳去匯合佢o地，原來葵芳o既弟兄姊妹係食o左飯先至信息聚會，所以我同埋 Peter Wong, Ken Tsui, 大Man, Billy, Eugene, 甘國強, 黃浩基一齊o係葵芳食晏，第一次參加葵芳o既主日信息聚會，玻璃房o既聚會好得意，之後同 Billy 去o左深水埔逛街。 ^_^

日期：六月八日（星期五）

今日請o左假同 Peter Wong 去玩o下 ^_^，佢下星期一就要返去溫哥華，今朝真係奇怪元朗區天晴出太陽，我一起身仲唸住去海洋公園玩o添，點知港島區出紅色暴雨同埋雷暴警告，不過我去到銅鑼灣亦沒有下雨，我同 Peter Wong 與 Tony, Joe 去o左香港中央圖書館參觀同埋安靜，呢次係我第一次去呢間圖書館，呢間圖書館o既設計好似成間酒店商場o既樣，同溫哥華圖書館果個羅馬鬥獸場式o既建築各有千秋，香港呢個裡面都好先進同埋好大，有好多比人休息o既地方，真係適合我o地去安靜。

我o地安靜好後，就搭電車去上環同 Titus 一齊食飯，仲去佢公司探望佢同埋 Mary ，呢次有係我第一次搭電車，原來以前電車o既路軌係沿海咁樣興建，咁樣一睇係原來港島區有好多地都係填海得o黎，真係唔簡單！下午我o地搭渡海輪過到尖沙咀，步行去o左科學館參觀，我o地本來約o左 Terence（李家驅弟兄）同埋 Helen （張育燦姊妹）食飯，不過我o地尖東唔知搭乜o野車可以返入屯門，真係鄉下老出省……，我o地入到屯門已經八點幾，因為 Helen 有Ｄ唔舒服，佢o地已經返o左屋企 >_<，最後帶埋 Peter 參觀埋執事室同屯門聚會地方，就送佢搭小巴返屋企。

日期：六月七日（星期四）

今執埋《但以理書概略》Ｄ更正，同埋處理埋《約翰福音各章綱要》。

日期：六月六日（星期三）

今日要處理《約翰福音各章綱要》。

日期：六月五日（星期二）

今晚我去o左牛頭角參加祈禱會，終於可以係香港見o下志輝哥哥，我同志輝哥哥同埋 Eagle, Titus, Tony, Joshua 去食飯，我o地大家真係同心合意，個個都叫蛋有六碟飯四碟都係蛋 ^_^ ，係聚會到仲見番亞 Ken ，佢比我早半日到香港。

日期：六月四日（星期一）

噢！咁就冇o左六月三日，今朝十點鐘到香港機場。要好好休息一天 ^_^ 。��

日期：六月二日（星期六）

眨下眼就要返香港啦！今朝去o左 UBC o既海灘，記得九九年o既生日同主約定係 UBC o既海灘與祂親近，但係因為發生o左Ｄ事令我去唔到，感謝主償還o左我o既心願，雖然遠o左Ｄ，但都好值得，我與主漫步石灘，享受著海風和美麗的境色，感謝主的同在和安慰。 好寶貴弟兄們的溫情，Martin 剛係卡加利回來，今朝去送佢爸爸媽媽去機場，之後就到 UBC 接載我一同去共進午餐，依家佢同志輝係 868 果度裡幫教會做o野，佢依家製作緊溫哥華教會o既網站，願主與佢同在，幫助佢係一切o既事上都順利。

最後，我o係係晚上十一點飛，九點要鐘要 Check in ，在八點鐘未找到車，多謝主在那麼緊張時間為我奇妙地預備 Edward 接載我同埋黎哥哥送我去機場，主實使萬時效力使班機 Delay o左，我亦趁住有時間，就打電話比Ｄ仍未見過面o既弟兄亞 Sam 同埋 Henry Kwok ，多謝主的疼愛。

日期：六月一日（星期五）

星期二、三都係天陰，氣溫比較凍，我都估唔到係呢段時候仲要著長袖衫，所以借了個弟兄件衫o黎頂住先，感謝主係星期四出太陽，天氣晴朗，氣候和暖，今朝下起大雨至中午才停雨，感謝主使巴士停使，我可以與主在街上散步默想，我由 Granvill Staion 經過 Granvill 橋，從 Broadway 返回１２３聚會處，這一切的景物給我許多的回憶 ^_^ 。下午與 Job（即亞Dick）交相，由１２３行到科學館的河旁公園，亦係１２３見番一班 High School 的弟兄 William Phun, Kennth Su 同埋 Leon ，但係 Leon 唔記得o左我係邊個，難怪o既，我只係同佢小組過一、兩次，Kennth o既結他技術已經好棒！

今晚我去 UBC 同余哥哥同埋 Titus Camp ，余哥哥煮o左Ｄ紫洋蔥比我o地食，我好鍾意食洋蔥，一食就食o左三四個 ^_^ ，之後余哥哥同我玩一Ｄ視覺錯覺o既遊戲，亦o羅o左Ｄ陳年舊相出o黎比我o地睇，佢仲指比我睇邊個係培哥、湘文哥……，果陣時佢真係好攪笑 ^^ 。

日期：五月三十一日（星期四）

今日係關世豪弟兄 (Jordan) 同毛慧菁姊妹 (Molly) 結婚o既大日子，我去o左 False Creek 度親近主，我以前係呢度同主有好深刻o既經歷。我沿住運河邊o既小徑，默想過同主和弟兄姊妹在溫哥華的片段 ^_^ ，走到一個水塘就停係度欣賞水塘o既景色同埋塘邊o既小動物，然後返１２３見到 Harmony 同埋以前班 High School o既妹妹（現在已經升上 College），我o地襯住仲有時間就去 Down Town o既 Robson 街逛街，係o個度又走o左去咖啡店度歎咖啡。

下午四點鐘左右，婚禮正式開始（今次婚禮o既襯托音樂係 Canon D Major (用Windows Media Player 播放)，亦係我喜歡樂曲的其中一首）Molly 的爸爸同佢一齊入場就奏出 Wedding March ，今次o既司儀就係 Peter Leung 同埋袁淑芳（夫妻檔），而註冊官亦係上次幫 Peter 同亞芳o既o個位，今次婚禮都算是簡單而隆重。

晚上去o左佢o地飲宴 ^_^ ，Jordan 同 Molly 都大展歌喉，整晚個氣氛都好開心。 ^^

日期：五月三十日（星期三）

昨天一訓就訓到今朝十一點，然後我同黎文浩和Chris去了一間 High School 探弟兄們，這間中學給了我許多的回憶，我經常在這裡溜冰場溜冰，亦常在圖書館 check e-mail ，今次照常在圖書館裡 check e-mail ，除o左坐 counter o既係新面孔，其他o既員工亦都認到。

記得有一次係呢度o既廁所親近主o既時候留低o左本聖經係廁所，返到 Adanac 先知道唔見o左本聖經，之後返到圖書館的廁所已經唔見o左，Ｄ員工見到我搵緊o野，就問我係唔係唔見o左本書，我話係廁所唔見，佢就o羅本聖經出o黎問我係唔係呢本，因為上面貼o左我幅貼紙相，佢認得係我 ^^ 。o個陣時成日都約Ｄ弟弟係呢間圖書館和溜冰場會面傾計。

我o地經過 Adanac 去o左 764 ，係路旁見到滴血的心（學名：Perennial 俗名：Bleeding Heart）係 764 食o左午飯後，我就o左 Main 街到歎咖啡，當然係 Ice Mocka Vanti 啦！又去o左 Metro Town （係溫哥華最大o既 Shopping Mall）逛街，跟住就去o左１２３到佈置聽日o既場地，我o地佈置到十一點左右就返 204 -_-。

日期：五月二十九日（星期二）

仲係廿九號溫哥華時間十二點到達 Richmond 機場，感謝主！過關一切都好順利，之後搭的士去１２３聚會處，心情好興奮！！！溫哥華o既執事室變o左好多，以前得兩電腦，現在已經添置五六部，原來 Frankie（孔繁基弟兄）都去了執事室度做，仲有 Terence, Ittai, 亞君，而 868 o個邊就有 Martin, Peter Leung 同埋志輝哥哥。

我同 Frankie 同埋 Peter Leung 去了美琪餐廳，呢間餐廳以前我o地成日都o黎幫襯，個老闆娘都冇變仍然係咁見談。晚上去了怡寶餐廳，聽聞已經轉了手，呢間餐廳以前同班１２３弟兄經常o黎食o野，連牆上梵谷o既掛畫都冇變，只係變o左Ｄ侍應同埋餐牌。

我又見到黎文浩弟兄 ^_^ ，我與他並 Chris 住係 868 o既 204 弟兄房。然後係１２３o既廚房遇到 Jordan 同埋 Molly ，只是傾了幾句計，因為佢o地趕住走。

晚上參加祈禱會，因為精神欠佳個腦都實晒，好想早Ｄ訓覺，不過好開心可見番咁多弟兄姊妹都抵番晒。完o左聚會一返到 204 放低o野就走去訓 zzZZ -_-。

日期：五月二十九日（星期二）

今日十一點要上機，所以要九點鐘 Check in ，好感動陳志威弟兄特意請假接送我到機場，Check in 後我o地去o左 Super Sandwich 食早餐。

日期：五月二十八日（星期一）

今日預備明天起行去溫哥華要帶的物資，好開心知道楊志輝哥哥返了香港，唔知幾時可以見到佢呢？

日期：五月二十七日（星期日）

昨晚 Peter Wong 從溫哥華來探望弟兄姊妺，這是他第一次踏足香港，今天我去了牛頭角聚會處與他會面，記得我與他曾在 Crab beach 一起親近主，他鼓勵我用英文向主祈禱敬拜，那次就是我第一次用英文向主禱告，他亦教我唱些英文詩歌和一般生活的慣用語。今天心裡真的興奮可以見到他（有朋從遠方來不亦樂乎）。今天亦是 Tony 正日生日，我們與 Peter 中午和 Tony 慶祝，之後 Tony 與 Abby 和我還去了咖啡屋嘆咖啡傾計（時間實在太短，盼望他日能再暢談），感謝主將弟兄姊妹給了我們，使我們能彼此相愛和支持。

（Peter 佢唔識睇中文）Peter Wong had arrived on last night who is come form Vancouver. This is the first time he come to Hong kong. Today I go to Ngau Tau Kwok meeting place to met him. I had draw near to Lord with him at Crab beach (is in Vancouver). He teach me how to use englsih to praise Lord. That is the first time I use english to praise Lord　^_^. And he also teach me to sing some hymns and some english sentence. I am very glad to met him today. We have lunch together. Today also is Tony's birthday. After that, Tony, Abby and I go to a coffee shop to taste ice moka ^_^, and followship with each another. Give thanks to the Lord.

日期：五月二十六日（星期六）

今天我與 Joshua 在將軍澳與將軍澳的中一弟兄姊妹一起聚會，亞 Joe 與 Kenny 早上已離開將軍澳，佢o地今日玩聖經及常識問答比賽，氣氛也不錯弟妹也十分投入。旁晚去了獅子會將軍澳青年營探望畢業營的弟兄姊妹。晚上去了陳志豪 (Titus) 的家裡吃飯，他的父母與姐姐也熱情地款待我 ^_^。

日期：五月二十五日（星期五）

《窯匠的手》定價為 $23 ，可於葵芳光愛中心及屯門執事室購買。

後日是漢朱忠弟兄 (Tony) 生日，今晚我約了永富 (Joe) 、旗峰 (Vincent) 、國政 (Joshua) 、浩基 (Kenny)與 Tony 預祝生日，亞Joe、Joshua、Kenny與我在將軍澳聚會處宿營，我們一起相交，雖然時間有限，卻寶貴能走在一起。

日期：五月二十四日（星期四）

今天繼續入資料，《窯匠的手》已經運到執事室，遲些會發售，暫未定價。

日期：五月二十三日（星期三）

今天要開始輸入大型福聚會資料。

我預算廿七號會往溫哥華，但至今仍未出機票，令我感到有點不知所操，最後亦係海外部預訂機票，感謝主仍然有機位，票價還很平宜。

日期：五月二十二日（星期二）

志光哥哥係星期六返o左o黎，今日幫佢 send e-mail 比弟兄姊妹，所以做o左真人發聲人手輸入工具 ^_^。

日期：五月二十一日（星期一）

我們的研讀室將由執事室旁，遷移至 102 室，因為空間太細不夠容納和擺放余弟兄的書藉。

日期：五月十九日（星期六）

我家族的弟兄姊妹去了鹿頸燒烤旅行，可惜今天下起大雨，感謝神當我們下車時出太陽，我們在草地上玩集體遊戲，當我們下去預備燒烤，又下起雨來，弟兄姊妹要開傘燒o野食，有Ｄ用錫紙將o野食包好，然後燴o野食，雖然落雨，氣氛亦唔錯，Ｄ新朋友係亭o個度避雨，弟兄姊妹o羅食物去款待佢地，感謝主吸引o左 21 個新朋友參加我o地o既活動。

日期：五月十八日（星期五）

今天是盧永健弟兄與周淑筠姊妹結婚之喜，下午去了觀禮，晚上去了他們的喜筵。

今天回執事室時，發覺一切都很齊整，原來嘉慧和潔芳將執事室的文具與用品處理得井井有條，連我的檯面亦執得好整齊，果然新人事新作風，因為太整齊要用點時間去習慣和適應，要重新去確認一些文具及文件的位置。由於今晚要去飲筵，本來本星期的本區教會通告，我想留在明天才處理，不過在飲筵中同團的弟弟打電話來提醒我明早要去旅行，所以我亦趕回執事室處理通告，那時才發覺嘉慧和潔芳連我所用的文具和文件也一同棄置，感謝主使我趕得切搭尾班車返屋企 ^_^。

日期：五月十七日（星期四）

今天的工作都好特別就教他們如何玩《蘇格蘭特警》遊戲，之後去安排聚會處傢俱的擺設和佈置。

由於時間比較緊逼，我和一對夫婦趕去買手信和去碼頭匯合士培哥與郭偉明他們。

日期：五月十六日（星期三）

我們昨晚在教會宿舍宿營，在那裡的露台可遠眺澳門市中心至港澳碼頭一帶景色，今朝我們去了古堡山那裡親近主，環境幽雅優恬靜，境色分外怡人，亦有一座戰時遺留下來的好像古堡建築的防空洞。

之後，返回光愛中心協助同工們使用電腦軟件的一些技巧，晚上去了一間餐館品嚐些特色小菜，如�穭��c、葡國雞……等美食，接著回去宿舍開會傾談中心的方向和解決些執行上的問題。

日期：五月十五日（星期二）

今天十二點半正式出發去澳門教會工幹，感謝主使我們與郭偉明弟兄和黃群好姊妹的來回船期是一樣的，這樣就多了兩個伴，離開碼頭後隨即往黑沙環聚會處探望弟兄姊妹，原來那裡的光愛中心只成立一個月左右，今次我們去協助他們技術上的問題和了解他們週間運作的情況。

我們的聚會處十分接近關閘（通往珠海的海關），只須步就可以到達珠海的拱北，在那裡我們買了些書藉和圖庫軟件。

日期：五月十四日（星期一）

明天我會與士培可去澳門逗留三日兩夜，今次是我第一次踏足澳門，今天繼續處理《約翰福音概略》，我還買了個紅外線鍵盤都幾好用丫。

日期：五月十三日（星期日）

昨晚鎮華都預o左個橫幅會唔夠力會跌落o黎，佢亦想了解決的方法，點知今朝收到電話話昨日我o地所掛o既橫幅真係跌o左落o黎，感謝主！使我o地好快地就攪掂o左，可以交到功課。

之後去o左控制室學o下o野，要攪一場福音聚會o既音響同埋燈光真係唔簡單，原來控制室負責音響o既大細聲，而咪o既開關係由後台o既控制台負責，因為後台聽唔到觀眾席o既音量，所以要靠控制室去調較，由於後台恐怕果Ｄ無線咪會有回音，所以弟兄姊妹講完對白之後就熄o左，不過係台上面要攪清楚邊個咪對邊對開關都唔容易，加上一發覺Ｄ咪冇聲，Ｄ負責弟兄姊妹就好緊張，齊齊o禁對講機同後台同埋控制台講o野，令到Ｄ對講機放唔到訊號，感謝主使一切都有驚無險地完成。

而且今日有好多人o黎參加，我o地家族都有九個弟兄姊妹約到佢o地o既家長同埋親戚o黎福音聚會，見到呢個場面都好感動。

日期：五月十一日（星期五）

今朝我去o左工業學院交表格，我想讀o下同電腦有關o既學科，不過相信機會比較微，願主成就佢o既心意啦！

嶺南會堂福音聚會一切的事要在今天才能作實，無論場刊、問卷、橫幅……，因為太趕所以有Ｄ唔開心，之後同 Titus ICQ ，佢話果陣時溫哥華都係咁o架啦，佢會為我代禱 ^_^。感謝主！有班寶貴o既弟兄姊妹仗義相助，一齊去做當日的佈景同埋摺場刊，一切都算順利。

日期：五月十日（星期四）

經過培哥o既過目，《窯匠的手》個封面終於都 Pass ^_^，昨晚去o左o羅埋正稿，那弟兄仲教埋我揀色 tone ，最後今日揀o左啡色，o羅去印刷公司就攪掂。

另外，福音聚會的佈置最後決定掛橫幅，感謝主，我去到廣告公司他們正想拉閘，我向他揮手還買得到。

晚上與弟兄同工們去食壽司 ^_^。

日期：五月九日（星期三）

昨晚因為太夜，所以係元朗訓，不過今朝我要返去牙醫度覆診，今次是最後一次，亦都係最貴o既一次，醫生同我做o左個假牙套，將隻牙套套入事先放好的牙樁，再用膠水粘好，就大工告成。不過咬落去始終都冇原有的好，要去習慣先得。

日期：五月八日（星期二）

今日要跟進《窯匠的手》的封面，由於那弟兄要上班比較忙，加上找不到合適的圖片，最後在一些兒童聖經中找到合用的圖片，放工後我去了那弟兄的屋企一起跟進這件事，好開心能一睹他的功夫，真係好快，快到我都睇唔切，真係佢隻手仲快過我對眼，用了一個鐘就能夠重新做起個封面，比我真係要做幾個鐘先掂，佢亦教o左我一Ｄ用 Photoshop o既技巧，真係獲益良多 ^_^。

日期：五月七日（星期一）

o黎緊星期日就係《母親節綜合福音大會──情繫大地》信相今個星期都會幾忙，今日要處理《約翰福音概略》，今次同前幾次的文筆有點不同，比較重點式帶出主題，餘留些讓弟兄姊妹默想和思想的空間。

日期：五月四日（星期五）

近排同工間發生了些不愉快的事，感謝神透過那事使我們認識是仇敵的作為和只是一場誤會，亦使我們同工間了解也多了。

日期：五月三日（星期四）

今日印埋未印完o既母親節海報，同埋出今晚特別聚會要用o既筆記。

日期：五月二日（星期三）

今日又要開工啦！近排跟緊另一本書係關於約翰福音的查經，今次比較特別唔逐章逐節去解，比弟兄姊妹有更多默想空間，《牧養我羊》一書已經到o左，今次會放係豐美登果度賣，同埋生命流變o左有限公司。

日期：五月一日（星期二）

今日係五一勞動節，大陸會放假一個星期，一出到大街就人山人海，今朝要八點鐘就起身，因為要趕住返落香港，食o左早餐後，我o地班弟兄去o左肓人按摸院比人打，今次係我第一次去哩Ｄ地方比人打，打倒成身好似痲痺咁，你都咪話唔得人驚，鎮華仲想比人打多兩個鐘 ^_^，感謝主，我o地返香港過關都算快，可快Ｄ返屋企休息o下。

日期：四月三十日（星期一）

今日我們去了三鄉o既滑草場果度玩滑草，原來玩都幾辛苦，玩o左一陣就已經好倦，之後仲遇到士培哥哥和湘文哥哥佢o地（其實都唔係撞到，係事先約埋），我o地仲一齊玩碰碰車添 ^_^。

日期：四月二十九日（星期日）

今天我們家族的弟兄姊妹去了大棠舉行擘餅聚會，平時係聚會地只可望住個天花板，今次可以望住個天去默想實在難得 ^_^，下午我們一班同工出發返大陸中山玩o下，Ｄ同工話都未試過食o野食得咁豪，好似唔使比錢咁 ^_^。

日期：四月二十七日（星期五）

昨晚險些要在樓梯口坐到天亮，因為元朗鳳琴街聚會處的樓梯口已上了鎖，思前想後也是要找看更來開閘 >_<，今朝搭輕鐵的時候，向主祈禱叫主獎些東西給我，使我開心些，感謝主真的聽了我禱告，使我中了一包冬菇 ^_^ 。

《母親節綜合福音大會──情繫大地》的海報已經張貼於聚會處。

日期：四月二十六日（星期四）

今日係黃鎮華弟兄生日o既日子，我o地班同工同佢攪壽筵，仲有演譯佢人生片段o既話劇，同埋為佢作o左首歌，令佢唔知點咁，最後仲出埋靈堂哩招，講講佢係Ｄ學生心目中o既印象，Ｄ弟兄姊妹真係唔話得，咁樣都比佢地唸到。

母親節的福音單張，已交給印刷公司印刷。

日期：四月二十五日（星期三）

嘩！好唔掂呀！佢o地班人係執事室度放榴槤毒氣，仲勁過希特拉Ｄ毒氣室，爸爸聞到Ｄ榴槤味會暈暈地，我聞到就會想嘔，認真嚇人呀 >_<！

日期：四月二十四日（星期二）

今日個牙醫冇打痲醉藥，仲有好快就攪掂，不過今次好得意用o左兩支好似�v具槍o既工具，向住我個口射，有Ｄ攪笑 ^_^。

《窯匠的手》已交給印刷公司印製，相信好快就會發市，不過封面仲未做好。

日期：四月二十三日（星期一）

今朝又要去見牙醫，要補返左邊兩隻大牙，先前右邊的大牙要杜牙根，明天又要去進行第三次的杜牙根，所以今天和明天只可以吃流質的食物 >_< ，由於這兩晚都冇時間去o訓覺，令我實在太眼o訓，所以中午去了午間小睡 -_- 。

今日兩位新同事梁嘉慧姊妹和蔡潔芳姊妹，正式在執事室任職，歡迎！歡迎！

日期：四月二十一日（星期六）

今天就係郭偉明和黃群好的大喜日子，由於今朝七點半先返到屋企，本來都唔想去觀禮，因為實在眼o訓，但我恐怕一o訓就o訓到下午三四點咁就出事，因為佢o地套幻燈尚未完成，所以今朝九點九就起身，我o既感覺好似魂不符體咁樣，食完飯後就趕返去繼續攪o個套幻燈，有o左昨晚的經驗，所以今次到快手o左好多，但係連埋試片都要做到五點半，感謝主仲趕得切去茶會，一去試o左機就要播，感謝主一切都很理想，茶會後我o地仲要清理場地，體會弟兄姊妹同心合一的力量，我o地用了半個鐘至九個字的時間，就執拾和清理好聚會處，相信是清潔事務o既最快一次。

日期：四月二十日（星期五）

今晚與大叔去了市中心吃飯，我仲同講佢o既輩份仲高過我，我只係三叔，而佢就係大叔，吃完飯後，我o地回執事室處理廿一號晚要用的幻燈稿，寶貴弟兄真的為患難而生，本來只想佢o黎參觀o下南光樓同理執事室o既新貌，點知仲要佢幫手做幻燈，我o地係電腦匯入聲音就法覺出事，佢o地把聲變o左老牛聲，我o地惟有將人聲和幻燈分開播放，由於旁白人聲要夾相片，所以淨係剪輯聲音攪到零晨三點，因我同佢的神智都開始有點唔清醒，攪到零晨五點，佢就o訓o左覺，我見到佢o訓令我都好想o訓，咁就係執事室o訓到朝早七點，佢要趕返屋企繼續o訓覺，我亦返o左屋企o訓覺。

日期：四月十九日（星期四）

今天是鄭善業弟兄（爸爸）的生日，Happy Birthday to you !!! 我o地一班執事室同工去了 Pizza Hut 食飯，還買了個芝士蛋糕為他慶祝，爸爸仲玩o左 Pizza Hut o既急口令比賽贏o左三張書簽 ^_^ 。

日期：四月十八日（星期三）

今早要去睇牙醫複診，下次又要去補牙 >_< ，我亦開始印製廿一號o既場刊，下午我去了元朗與黃鎮華和梁德源去了一間餐聽，食中午自助餐和交了部分的場刊給他們。

日期：四月十七日（星期二）

今天鍾旗峰弟兄的生日，我約了他星期五一起吃晚飯，我還要預備廿一號用的簽賓客名紙，並且去揀用來做當晚場刊的紙。細碼和帶金在今個月尾會唔做執事室的文員，今天佢o地要計下有幾多日大假可以放。

日期：四月十六日（星期一）

今日開始預備四月廿一日晚上郭偉明弟兄與黃群好姊妹的感恩茶會，黃鎮華將聚會處佈置成為花園咁樣，佢用o左二百多朵向日葵，幾十朵玫瑰，一匹匹的絲帶去佈置，還預備當晚用的木檯，真係唔話得。

李兆良哥哥和彭小平姐姐從南非回來，今晚我o地同埋一班舊同學o既弟兄姊妹係尖東食自助餐，平日大家各有各忙，實在難得有這樣的機會聚埋一齊，佢o地大部份都係同我同屆的弟兄姊妹，睇見佢o地心裡就覺得歡喜，因為有Ｄ弟兄姊妹已經隨流失去，佢o地仍然堅心跟隨主到如今。

日期：四月十五日（星期日）

寶貴主耶穌已經從死裡復活o左啦，哈利路亞！今天是復活節假期，我和家族的弟兄姊妹去了蝴蝶灣玩水戰，可能上次係貝澳玩得唔夠喉，今次想玩番夠本，今次我預備了百二個水彈，二百個膠袋和三個垃圾膠袋，實行玩儘佢，在過程中……梁芷茵姊妹慘被推落地，比弟兄姊妹射濕，而郭偉明弟兄慘遭被捉住手腳拋進海中，後來那班姊妹還出秘書武器──麵粉，令弟兄們被攪到滿頭白髮。

日期：四月十四日（星期六）

今天是第二天的特會，晚上我同 Titus、Tony 和 Joshua 去o左小巴黎食晚飯，佢o地加埋 Vincent 果陣時係１２３o既住客弟兄，而我只係訪客和暫住，難忘果陣時同埋楊志輝哥哥，係果度玩１２３ Adventure ，Vincent 臨離開溫哥華時，我o地同佢係１２３果度玩玩最後一次１２３ Adventure。

日期：四月十三日（星期五）

今天受難節亦是第一天的特會，下午與 Abby 和 Titus 去了一間咖啡屋飲漠卡咖啡，我已經好耐未飲過了，我估唔到係香港都有這間咖啡屋，記得第一杯的 Ice Mocka 係張育燦姊妹請我飲雖然貴o左Ｄ的不過實在太好味啦！晚上與周永富弟兄（Joe）和鍾旗峰弟兄（Vincent）又名大叔 ^_^，今次係 Vincent 請我同埋亞Joe 去飲咖啡，雖然那間咖啡屋已經滿晒人，我們惟有係排隊位果度一齊共進晚餐，仲好有加拿大風味 ^_^ 。

日期：四月十二日（星期四）

《雲彩見證》已重新名為《窯匠的手》，封面亦交給上次做《牧養我羊》的弟兄處理。

日期：四月十一日（星期三）

四月十三、十四日是新伊館特會，今天要處理當日要用的筆記，而爸爸亦密鑼緊鼓地製作 Power Point ，請弟兄姊妹多多代禱記念。

日期：四月十日（星期二）

昨晚牙痛得要命呀！今朝忍不住要走去樓下的牙科診所看牙醫，醫生話我右邊的大牙已經蛀死了，如果早一點看醫生或者可救得番，感謝主！醫生說我的牙腳仍保存得很好，只要杜牙根就可以了。那知杜牙根原來好貴，足足花了我半個月薪水，那刻有一點體會那患血漏的婦人的境況，她花儘養生的去求醫……

日期：四月九日（星期一）

細碼和亞金四月尾就要離職，因細碼的舊公司找她返去幫手，她與舊同的關係也很好，願主祝福她五月份新的工作。

日期：四月六日（星期五）

今天要去文商團契，所以昨晚在聚會地方過夜，新元朗中心新開了一間百佳超級市場，都幾方便弟兄姊妹，我和一些弟弟去預備愛筵的食物，那裡熟食部的食物價格都算合理，我們還買了一隻燒雞和幾盒粉麵添！

昨晚因為牙痛整晚都「訓」唔到，真係慘！ ~^-^~（唔通哩Ｄ就係牙痛文學「有苦自己知」^_^）

日期：四月四日（星期三）

明天是清明節假期，我們家族預算今晚夜闖鳳凰山，可惜今天下起大雨，果然係清明時節雨紛紛，我們決定取消行程，改為明早去蝴蝶灣安靜，下午去飲下午茶，然後去何妙舒屋企玩。

日期：四月三日（星期二）

我與執事室的同工下午去了飲茶，講及關於我們一班同工返大陸玩的事，對這方面有經驗的弟兄建議去肇慶，他說那裡是中國的十大景點之一，我對這些都不太認識，有得去玩就已經好好了 ^_^。

日期：四月二日（星期一）

爸爸今日又冇返工，可能星期一係佢o既例假 ^_^。培哥又出o左葵芳，所以成日都冇乜o野做，十分清閒，終於可以休息一天 ^_^。

日期：三月三十日（星期五）

昨晚幫團裡的弟弟整電腦夜了，便在元朗聚會處宿一宵，由於今日返工返晏，所以今朝去了琴行買了兩個口琴，上了精英聚會處安靜，之後遇到羅偉成弟兄，便與他夾詩歌，他彈鋼琴，我吹口琴伴奏，都幾好玩丫。

日期：三月二十九日（星期四）

今天楊子雄弟兄上了南光樓探望我們，他患了急性肝癌，患肝癌的病人通常兩三星期就會去世，感謝神使他還存活，由於他肝臟失去排毒功能，以致肝臟腫脹，雖然病情並不樂觀，寶貴他仍對神有信心，願主成為他心裡的力量和安慰。

日期：三月二十八日（星期三）

爸爸病了沒有返工，今天下午只剩下我一人在執事室，要繼續處理《雲彩見證──舊約聖經重要人物》，本書已處理得七七八八，可以暫告一段落。

日期：三月二十八日（星期二）

近來執事室裡面有整水喉的工程，令到我都冇地方做o野，加上有些化學氣味，所以我搬了一張檯在執事室外面做o野，下午營養部生哥泡製椒鹽賴尿蝦和白汁芝士蟹鉗伊麵，真係好味道 ^_^。

日期：三月二十七日（星期一）

《牧養我羊》一書已交由葵芳文字部處理，今天開始要列印 Christian History 那光碟的內容放於研讀室供弟兄姊妹參閱，我只印了其中歷史那部分的一半，已載滿了六個 box file ，現在士培哥要檢閱那些部分適宜放於研讀室。

日期：三月二十三日（星期五）

今天請了下午與家族的弟兄姊妹去大嶼山的貝澳野營，唔好以為他們聚賭，其實係玩緊橋牌，近來家族興起玩橋牌的熱潮，弟兄姊妹玩到唔捨得返屋企，另外，今晚還一起ＢＢＱ，你睇幾開心。

第二日，我們還玩起水戰來，個個都玩得好投入。

日期：三月二十二日（星期四）

今天我放工後去了某弟兄的糖水舖幫手，除o左弟兄姊妹今天o既街客都有唔少，都算幾好玩，而且有好多糖水都賣清晒（幾開心啦），最攪笑的就我們拉了半閘要收舖，還有人穿過半閘入o黎買糖水，雖然冇乜o野可以比佢o地揀，佢o地仍好樂意幫襯都算唔話得。

日期：三月二十一日（星期三）

今天晚上要出席楊蔚然弟兄的安息聚會，下午當我處理他的場刊時候，才知道他已改名為楊天暉。感謝主使參加安息聚會的人數也不算太少，也有與他相熟的弟兄姊妹出席，但當我瞻仰遺容的時候心裡亦感到惋惜，深盼他的家人能早日歸主。

日期：三月二十日（星期二）

今天請了上午假去送信蓮姐機，接著我與朱漢忠弟兄 (Tony) 和黃嘉慧姊妹 (Abby) 去了西環與陳志豪弟兄 (Titus) 一起吃午飯，他送了些小禮物給我們，並帶我們去>參觀他的新公司，他在一間網上賣書公司工作，我們發現他公司有許多麥o麥漫畫書，我和 Abby 都訂了些麥o麥書，之後我們還打電話去溫哥華找李香蓮姊妹 (Helen) ，她說溫哥華教會的春假課程正進行得如火如荼，今天是他們第一天開班，而且今次他們嘗試免費開班，吸引了三十多位中學生的新朋友參加，願主堅立他們所作的工。

日期：三月十九日（星期一）

今天要處理些福音話劇稿，講開話劇許多弟兄姊妹在這方面都很有才華，不論是寫稿或演出都十分有水準，現在將這些稿整理及系統化，盼望能方便弟兄姊妹。

日期：三月十六日（星期五）

現在《雲彩見證──舊約聖經重要人物》只剩下三至四個人物還未完成，請繼續代禱記念，我們預算今次印約1000本，並且會限量發售。

日期：三月十五日（星期四）

今天我請了假去與家族的弟兄姊妹去了赤柱預工，感謝主！吸引了十多個新朋友，並且天氣晴朗最適合去旅行，我們還影了不少相片。

日期：三月十四日（星期三）

今天繼續處理《雲彩見證──舊約聖經重要人物》，近排培哥寫稿寫十分快，實在多得弟兄姊妹的禱告，加上身體比較累，所以我打了幾天都未打好，我們預算四中旬至下旬會出版，內容都算豐富，約一百二十多頁。願主祝福一切校對。

日期：三月十三日（星期二）

今天的驗血報告已出了，護士說我的情況出奇的理想。感謝主！原來我有 1000 mIU/ml 的抗體（即有一千度預防肝炎抗體）一般人只需多於 10 mIU/ml 就有足夠的抗體去預防肝炎，護士對我說九年內都無需要打預防肝炎針。

日期：三月十二日（星期一）

楊蔚然弟兄因鼻咽癌於 10/03/2001（星期六）離世歸主，他曾 90-93 年間與我們一起聚會，在 91 年我已轉了另一團去，所以亦不知他何因會沒有返聚會，他的家人今天來了聚會處，請我們為他安排安息聚會，他的家人還拿了一本相簿我們看，那相簿還保存得很好，它勾起了我許多學生時快樂的回憶，那時他經常為弟兄姊妹拍照，而那相片是我們出外家生活時拍下來的，他身旁那隻狗是在街上遇到的，因為牠常常跟著蔚然，所以他便與牠拍照留念。願我們惜珍主給我們還有氣息的日子，多去感恩、享受和欣賞身邊的人和事物，使我們生命活得精采動人。

日期：三月九日（星期五）

感謝主！《牧養我羊》很順利地出到內文與封面，希望能在下星期四出版。另外，我去了南光樓樓下的診所睇第三次醫生，今次還加埋驗血，醫生開了些會令人昏昏慾睡的藥給我，當我服用後隔了半小時至一小時藥力發作時令我全身都十分疲累，或許我真的要休息多點。

今天是周劍礎弟兄生日的正日，我和黃鎮華弟兄與他一起共進晚餐，之後去了鎮華家裡為他慶祝，寶貴鎮華對我們熱情的款待，令我感到很舒暢，我們一面睇鎮華的經典相片，一面聽著些悅耳的民謠音樂，睇完相片後，我們下了海灘和碼頭相交人生的一些體會，寶貴能有這樣的閒情生活。

日期：三月八日（星期四）

今天輸出公司在出《牧養我羊》的菲林出現了些問題，最後亦要交到文字部代出菲林，封面的分色亦有些問題，願主祝福負責的弟兄姊妹有智慧和快手筆。另外，我和一班同工去會某同工的會所裡家生活，我們一起ＢＢＱ、打波、坐安摩椅、焗桑拿和浸風呂浴（即有冷水和熱水設備的水池）但由於熱水池的水溫（46度）實在太熱，我們不能浸下去，只能坐在池邊傾計，不過同工們都玩得十分愉快，不知不覺間已玩到十點幾。

日期：三月七日（星期三）

由於星期五是寶貴的弟兄周劍礎生日，今天與他一起吃午飯，明晚同工們會一起ＢＢＱ一同慶祝。另外，《牧養我羊──初信聚會指引》的封面已經完成，要趕快拿去印刷，請多為這方面代禱，求主使一切都順利，盼望能預期出版。

日期：三月六日（星期二）

昨天是惠娟姐（士培哥的太太）的生日，我們一群執事室的同工今天去了 Pizza Hut 食午餐，因為娟姐和國強都是在本月生日，而我們有些優惠咭，所以獲贈 Pizza 一個，我們還有九折咭，今餐食得真係平宜！ ^Q^

日期：三月五日（星期一）

今天繼續處理《牧養我羊──初信聚會指引》已經差不多可以拿去印刷，封面亦有待那弟兄處理，不過今天執事室的電腦又出問題，我們雷射列印機不能正常運作，以致影響我們的進度，請弟兄姊妹多多為我們代禱。

日期：三月二日（星期五）

病了幾天早餐和午餐通常都係食粥，我與一班執事室的同工已一段時間沒有一起吃飯，今天與細碼和亞金去了新墟吃午飯，亦談論到教養兒童的問題，我們都有同樣的見解，覺得父母們應該以身作則去教養下他們的一代，這個都算是幾有趣的話提。

日期：三月一日（星期四）

在執事室中有些屬靈書的光碟，有 John Gill, J.N. Darby 和 McStong 的查經書，還有 Christian History Library 是講及教會歷史中的復興家，還有 Christian Library 這光碟中共有五百多本書，實在足夠我看都看不完，所以要更加努力去學好英文。

另外，我正處理《雲彩見證》一書，是講及一些舊約聖經人物的書。《牧養我羊》一書已經七七八八，這書的內容也算全備，有各樣初信聚會的重點和注意事項，弟兄姊妹亦可彈性處理每個初信聚會，而封面設計也交給些對這方面有經驗和專業知識的弟兄姊妹處理。望盼能成為許多弟兄姊妹的幫助和祝福。

日期：二月二十八日（星期三）

明天是周永富弟兄生日，今天我約他一起去市中心吃午飯。放工後我去了一間弟兄介紹的診所看醫生，原來那醫生是外國人仕，並且是一位基督徒，我問醫生我有甚麼病，他說只是感冒，不是太嚴重。後來他還問我有沒有肝炎，我說：我不知道。他說：在香港十個人中有一個會有肝炎。他叫我過幾天後給他驗血。他說：若果驗出你是那十個人的不幸的一個，他會替我寫醫生紙往政府醫院檢驗，若果是良性的，你應該要感謝神，他會替我打預防肝炎針。感謝主使我遇到那麼好的醫生。

日期：二月二十七日（星期二）

星期六我去了排街症，排了兩個鐘最後也是拿不到籌，感謝主！使我去了元朗一間兒科診所，那醫生開的藥性較溫和，今天那醫生給我的藥已吃完，但仍是有幾聲咳。

《書卷概略之詩篇卷四》已經出版，內容也算豐富，附錄中亦有各詩篇的重點和在卷四中的聖經鑰節，方便弟兄姊妹默想。

日期：二月二十六日（星期一）

大件事啦！大件事啦！

那天使對他們說：「不要懼怕，我報給你們大喜的信息，是關乎教會的。因二零零一年二月廿四日（星期六）零晨十二時四十分在屯門醫院，為志軒（爺爺）和淑儀姐姐生了孖女，就是張大妹和張細妹。」

ＢＢ出世啦！你睇幾得意。（張大妹和張細妹兩個十分相似，所以你地睇一張都夠，你估下佢係大妹還是細妹！）

日期：二月二十三日（星期五）

今日如常，台長又有好o野廣播！

台長：早晨！各位親朋友！今日分享：
約15:13 人為朋友捨命，人的愛心沒有比這個大的。
約15:14 你們若遵行我所吩付的，就是我的朋友了。
約15:15 以後我不再稱你們為僕人。因僕人不知道主人所作的事。我乃稱你們為朋友。因我從我父所聽見的。已經都告訴你們了。
我們應當喜樂，因有主作我們的好朋友！
我：是的！不單只是朋友，乃是心交！
濫交朋友的，自取敗壞。但有一朋友，比弟兄更親密。（箴十八24）
某姊妹聽眾：那朋友──當然係我的良人啦！

今天咳嗽得特別頻密，仍未有時間去看醫生。今早去了機場送寶貴的黎文浩弟兄機，他會往溫哥華逗留三至六個月，願主使他入境順利在官員眼前蒙恩。回到執事室身體也覺得很疲累《牧養我羊》一書以到尾聲階段，再給些年長的弟兄姊妹校對就可以去印刷，願主祝福校對的弟兄姊妹有心力和精神去處理。《如果沒有耶穌》的海報今天已張貼在聚會處。

日期：二月二十二日（星期四）

今天繼續處理《牧養我羊──初信聚會安排指引》，盼望在三月中能出街，而爸爸繼續處理一些技術上的問題，我們打算列印一份英文的文字，卻遇上技術上的問題，因為有些英文常用符號，在中文視窗下轉了中文字如「's」、「't」等字眼，所以要在另一部安裝英文視窗去處理它。

日期：二月二十一日（星期三）

今早去送一位弟兄 Martin Ku 機，他是在溫哥華教會文字部工作，十分寶貴他放棄了報紙排版的工作，而投身於文字上的工作，弟兄姊妹有冇瀏覽過溫哥華海外同工訓練中心的網站呢？近排換了新裝，就是他一手一腳包辦。三月份開始有春季假期，他要回去作籌備的工作。

日期：二月二十日（星期二）

近日覺得身體不適經常咳嗽，所以今早去了輪街症，不過我去到的時候已，所有的早上的籌已經派完。惟有明天請早啦！不過明天要去送機，或許要留到三月初，才有一點時間再去輪街症，請為我代禱記念。

今次相信是舊病復發氣管敏感或發炎，回想九九年在溫哥華的日子，寶貴弟兄姊妹的疼愛，那時自己也覺得身體不適了一段時候，何家儀姐姐和鍾志棠哥哥帶我去了一間診所看醫生，雖然家儀姐與醫生有些言語上的難阻，但加埋我們的手語，醫生總算明白我發生了甚麼毛病，回到住宿地方後，弟兄姊妹對我看顧入微，有些搾汁給我喝，有些煮粥給我吃，有些送了些維他命丸給我吃，香港的弟兄姊妹亦送了些夏桑菊、果子鹽給我，後來還有歐效斌弟兄從香港寄了些坑生素我，神家的溫情實在令我感動和回味。

執事室已經安裝了寬頻，相信與海外和香港的弟兄姊妹可以聯絡得快捷，亦唔怕去下載一些較大的檔案，過往下載 1M 或以上的檔案足足花了我們半小時或以上的時間，葵芳光愛中心和溫哥華教會在幾個月前已安裝了寬頻，所以在檔案的傳送再不構成問題，實在方便了許多。可惜要面對技術上的問題，因為只有一台電腦才可以上網，所以近日亦少了與弟兄姊妺 ICQ 聯絡。

日期：二月十九日（星期一）

今日在 ICQ 上又遇到許多溫哥華的弟兄姊妹 Pristine, Edward 和 亞Lap 。 ^_^ 好開心可以知道他們和溫哥華的一些近況。

日期：二月十六日（星期五）

本來今日應該返遲一點，但為了要去今晚的特會，所以要早些返工。今天好開心有一位住在觀塘的弟兄朱漢忠（Tony），來到屯門與我一起吃午飯，因為他多謝我為他在找工的事上禱告。

在上星期他電郵給我，盼望我能為他找工的事上代禱，我亦即時回覆並為他禱告，主實在是聽禱告的神，事隔幾天有學校打電話給他，叫他去面試，在面試的當日他亦來電叫我為他面試代禱，我亦即時與志豪弟兄(Titus)為他代禱，雖然面試後要待校長的回覆，但一切仍然很順利，次日他致電給我說，校長以批核他的面試可以上班，我心裡也替他歡喜和感謝神。事後他知道同區的弟兄姊妹當日也上山為他代禱，他亦因此感動，神的家是多麼的溫暖，主也是活生生可經歷的救主，寶貴祂常垂聽我們的禱告，願頌讚榮耀歸給祂！

日期：二月十五日（星期四）

今日如常，台長又有好o野廣播！

台長：今日天氣:
一股冷嘲控告空氣由仇敵而來, 直吹心靈, 時速緩慢但具殺傷力, 請各位出門前先做足夠的屬靈早操同多穿上恩典 (SuperGrace), 在外常注意主同在, 逗留或慢步於清晨日光中,必定能深享阿爸笑容與悅納.
我：台長: 請問 SuperGrace 可以係邊度買呀？有冇專門店，等我o羅番張九折咭o丫。^_^

台長：買不到的, 只能從主領受:
使他榮耀的恩典得著稱讚；這恩典是他在愛子裡所賜給我們的。
我：原來係白白o既恩典，咁要成日著住佢啦！ ^_^

下午與去了一位弟兄黎文浩的屋企吃飯，係佢屋企掛住睇佢Ｄ生活照，睇到都唔記得o左返工o添！佢媽咪仲好熱地情款待。 ^_^

日期：二月十四日（星期三）

今日在 ICQ 上 Chat 得好開心，弟兄楊銓尊(Eugene)在 ICQ 做台長，我和些弟兄姊妹做聽眾，就講少少比你o地知，分享一o下我o地o既喜樂啦。

台長：以下主要新聞:
[ 主己經復活了,哈利路亞! ]
我：Give me ten!

台長：接住為大家報導體育新聞:
宇宙大賽, 己有結果, 一如以往:
基督以大比數打敗瘣鬼, 仲擊傷佢個死鬼頭! 難怪經上說:
但基督獻了一次永遠的贖罪祭，就在神的右邊坐下了。
從此，等候他仇敵成了他的腳凳。
因為他一次獻祭，便叫那得以成聖的人永遠完全。
我：永遠的勝利! 請鼓掌!!!!!

日期：二月十三日（星期二）

今日士培哥不在香港，所以我比較清閒一點，可以多一點時間安靜在主面前。

日期：二月十二日（星期一）

今日要處理《榮上加榮的人生》一書，好開心在 ICQ 有遇到一個在溫哥華姊妹，她叫 Karen 是 Sharon 的姐姐，在當地的大專團，另外，執事室旁的研讀室已經開放，盼望弟兄姊妹善用教會資源，此室內的書藉不得外借。

日期：二月九日（星期五）

請弟兄姊妹為大專福音聚會《如果沒有耶穌》代禱，詳情如下：

日期：二零零一年三月十日（星期六）
時間：下午二時三十分至五時正
地點：理工大學 UT201 室（人數230人）
內容：詩歌、見證、短講、小組討論、影片（永恆的路向）、福音信息。

日期：二月八日（星期四）

近排在 ICQ 上遇到那時在溫哥華與我同在中學組的弟妹，有 Wilson Lee, Sharon Zhaou, Lana 和 Joe Lee，好開心能夠知道他們的近況，有些弟妺已由中學組升上大專組，在傾談中亦體會他們讀書的辛苦，零晨一、二點還要在網上找資料做功課，願主輕散他們的擔子。

日期：二月七日（星期三）

細碼今天又病了，請繼續為她代禱。那些差傳資料已經入晒電腦，約有一百零六張。然後需要校對，不過每當我校的時候，經常令我有昏昏欲睡的感覺（可能要用腦啦！）所以我校對的速度比較慢，相等於入表的速度，請為我這方面代禱。

放工後，我們約定了去淑儀姐姐屋企（她過往曾與我在執事室裡工作），她丈夫（張志軒弟兄）是我的舊同學，淑儀姐姐正懷孕（是雙胞胎）預產期約兩、三星期後，唔知係仔定係女，希望係砌個『好』字啦。細碼病了、爸爸又唔得閒，所以只剩下我和亞金去探訪。

日期：二月六日（星期二）

星期一晚剛剛開了一個加拿大差傳聚會，那天有百多個弟兄姊妹，今天要處理那些差傳資料表。

日期：二月五日（星期一）

由於《牧養我羊》要預留空間給弟兄姊妹寫筆記，所以要排版要有所修改。另外，明天是崔文法弟兄的生日，今晚約了幾位弟兄與他食飯慶祝。

日期：二月二日（星期五）

細碼仍然請病假，求主按手在她身上，使她早痊癒。今天下午我們一群執事室同工和一群專心的弟兄姊妹，在南光樓共進午餐。而下午我請了三時假期，與 Martin 和一群曾往溫哥華事奉的弟兄姊妹，去了尖沙咀食自助餐。 ^_^

日期：二月一日（星期四）

細碼今天病了沒有上班，請為她的身體代禱，爸爸和亞金只是返了上午，下午雖只剩下自己一人在執事室裡，感謝主的同在，祂亦使我心快樂。

日期：一月三十一日（星期三）

昨日知道了一些消息，令我開心到成晚都冇乜睡覺，今早遲了些返執事室。而下午我請了假與一班學生和同工一起行山。

日期：一月三十日（星期二）

今日要處理《牧養我羊》一書，培哥想出得「高當」些，所以在印刷和排版上要花功夫，預算我們前面所出版的書，將會以有書脊的釘裝方法，而排版則用以標題式的方法，使弟兄姊妹更容易閱讀。

日期：一月廿九日（星期一）

今天是農曆年第一天的工作天，士培哥與我們一群執事室同工開會，講講執事室的制度和介紹一些工作技巧的書給我們看，我十分贊成去閱讀這類的書，提升自己與人相處或合作的技巧，其實自己亦有閱讀一些有關行政管理、員工管理、教會事務管理和人性心理的書籍，當然屬世的價值觀有許多是不合用的，我們也不只用方法和技巧，當然要依靠主啦！當我閱讀這類書的時候，從中發現到有許多的處事方法，在聖經中的《箴言》亦有相似之處，而箴言顯然有過之無不及。

日期：一月廿三日（星期二）

今天是年廿九，感謝主！雖然沒有放全日，但都有得早放工都算很好。今天沒有甚麼工作做，個個都係等放工，都算係休息啦 ^_^ 。

日期：一月廿二日（星期一）

今天要開始製作特會用的 Power Point ，要負責的弟兄姊妹已到影音部進行錄音和執相，而年初二我還要回來與士培哥開工跟進，願主祝福一切要用的電腦和器材，使製作順利並有良好的效果。

日期：一月十九日（星期五）

今天要製作士培哥的個人網頁，內容極為豐富，包括聖經概略、個人作品、信息分享、金石良言、訓練筆記……，當然唔少得士培哥信箱啦！但執事室只有FrontPage Express，所以製作過程比較困難，請代禱記念，盼望此網站早日面世，使弟兄姊妹能得著幫助。

日期：一月十八日（星期四）

農曆新年就快到，營養部生哥為弟兄姊妹做了許多迎節食品，如蘿蔔糕、年糕和芋頭糕，個個弟兄姊妹食過都話美味，我也拿了幾個給家人，家人都很歡喜，感謝主！神的家就是這麼溫暖。

日期：一月十七日（星期三）

培哥今天向我們宣佈一個好消息，一個壞消息，好消息就是年廿九我們可能會有假放，壞消息就是今年沒有團年飯吃，改為開年飯，因為培哥沒有時間。

細碼已將南光樓聚會處的房間，已往以名稱稱呼改為以編號形式，而工程部弟兄亦重新翻新舊執事室那間房，牆身和地板都重新油過和鋪過，果然是新年新氣象。

日期：一月十六日（星期二）

今日唔知點解咁累，可能天氣轉涼作病呱。我在執事室與一位弟兄 Titus (陳志豪) ICQ ，真的好寶貴有弟兄支持，之後我睡了片時，睡醒的時候那弟兄對我說："Good morning! baby......"，我心裡好開地回應天父說："Good morning! Abba" 寶貴可以在工作間裡彼此支持。

日期：一月十五日（星期一）

在執事室旁的那間房，培哥將一些自己珍藏的解經書放在那裡，供弟兄姊妹參考和追求，當中有許多價值不菲和珍貴的書籍，有些已經在市面很難購買得到的古聖徒釋經系列，我看見都愛不惜手，盼望弟兄姊妹能得到更大的造就。

日期：一月十一日（星期五）

今天我回到執事室，同工們都好希奇，點解我咁早返工，平時星期五我是返十二點放八點，因為要處理通告，要遲些才能放工，所以在工作時間上稍作調整，但係今晚有祈禱會所以要早些回來，至於通告就留番明天回來補做。

培哥今天又有新意思，要實行進度表，這樣都好，可以 keep 住進度，有具體共同實踐的計劃和目標，不過通常都係培叫我每天些甚麼甚麼，我就做些甚麼甚麼，所以如果佢唔比料我，我都無得做。爸爸繼續印相片的 index ，而我要打出外調查表的資料，同做埋些《詩篇卷四》的手尾，細碼要重整借帶櫃，佢今晚還要加班。

另外，係執事室我裝了 ICQ ，同些弟兄姊妹 chat chat ，在工作中彼此支持和關顧，都算一件好事。

日期：一月十日（星期四）

今天爸爸又沒有上班，他有那麼多假期，真是羡煞旁人。我和細碼與亞去了吉之島那裡吃飯，因為對聚會地方附近的食肆有點厭倦。另外，近排細碼和亞金都熱衷造伸縮膠，好寶貴，亞金送了一個鎖匙扣給我！嘻！嘻！

下午的時候，我比培哥「捉蟲」在工作時間作私人事，他給了我一些提點。迦南印刷就快要收爐，盼望能在收爐前出起本書啦！

日期：一月十日（星期三）

好寶貴！培哥叫亞金幫手入調查表，這樣可縮短輸入的程序，但實在有一個隱憂，就是我們是用 Excel 去處理這資料庫，我曾試過 Excel 只能處理大約 30行x800列 個資料的排序，不知道是否我們的電腦記憶體不足，或是其他別的問題，盼望面前能加添些擁有資料庫功能的軟件。

日期：一月九日（星期二）

好寶貴！剛剛處理完《牧養我羊》一書，又要繼續輸入調查表。而細碼要校對的部分，真是睇到佢眼都凸。另外，請為星期五晚余弟兄的特別聚會代禱，盼望他能完整地講解整個追求的藍圖。

日期：一月八日（星期八）

今天上午我與細碼和亞金一起為執事室的同工們禱告，這是今年第一次這樣一起相交代求，願主繼續祝福我們，使我們有更多的出產，聚會地方更加整潔和舒適，各種安排和設備能最方便弟兄姊妺，最重要的是弟兄姊妹心靈一同興旺！

日期：二○○一年一月五日（星期五）

好開心！今天一位從遠方來的弟兄探望我們，他就是伍嘉俊弟兄，他移民往紐約三年多的日子，今次第一次回港，細碼曾往當地事奉一年多的時間，遲些一定要約他聚舊。另外，我們終於有機會影些執事室同工合照，遲些你們就可以看到了。爸爸今晚要開通宵趕明天特會的 Power Point ，願主加他力量。

日期：二○○一年一月四日（星期四）

昨晚與一班弟兄姊妹食自助餐，然後去了一位弟兄家中留連，夜了回家，今天遲了一小時返工。今天繼續入資料，預算下星期一能完成。國強拿了一些詩歌 CD 給我，我已將它們轉為 MP3 收藏，一邊工作一邊欣賞。

日期：二○○一年一月三日（星期三）

培哥今天去了海外同工營之前，留下大團聚的調查表給我，今次是要統計出外的情況，在過程中看見一些中二至中四的弟兄姊妹，也有心志出外，我覺得真是不簡單。另一方面細碼、亞金、立強和金泉（他們兩位弟兄是工程部同工），一起在執事室大執位，他們花了一個下午清理雜物和搬傢俬，整個執事室立即寬敞了許多。

日期：二○○一年一月二日（星期二）

祝大家心靈進步，身體強健！今天是我第一日返全職的日子，培哥給了一大堆大團聚資料表輸入電腦作跟進和統計，打了整天才輸入了一百多張，預算要入幾千張都要用一星期多的時間，在輸入的過程中體會弟兄姊妹實在多才多藝，有許多專業的學歷和技術，若能一一發揮和配合，相信會成為更多人能得著祝福和幫助。

細碼在預備明天海外同工 Camp 的時間表和房間分配表，盼望能一起相熟和更深了解各地的情況，弟兄和睦同居是何等的善和何等的美！

日期：十二月二十九日（星期五）

在工作上我們常常要用許多的插圖，今天爸爸為我們將那些插圖製作成為目錄，方便我們尋找合適的圖片。原來大專詩歌已經出了版，我也不知道，細碼拿出來播，我才知道，那本詩歌集很精美。另外，有弟兄已將廿四號的舞台劇福音聚會製成 VCD ，這是暫出版，畫面質素方面略為遜色一點，不過音效都算不錯。

大團聚的彩色畫冊已經出版，今次會在大團聚免費派發給弟兄姊妹，士培哥預先給我們看看都算唔話得。

由一月二日開始，我會轉為執事室的全職文員，培哥預算一個月能出一本書。這樣，實在要弟兄姊妹代禱，使我們工作更有效率。

日期：十二月二十八日（星期四）

今天的花花（賴永珍姊妹曾於執事室工作）的生日，因為花花在天水圍返工，我們一群執事室同工就了她去了天水圍，與她一起去酒樓飲茶為她慶祝。

原來《詩篇概略　　卷四》還未完成，仍有待修改和處理。

日期：十二月二十七日（星期三）

在廿三及廿四號的舞台劇福音聚會，約有400多位新朋友參加。求主祝福一切的跟進工作。

日期：十二月二十三日（星期六）

嘩！原來爸爸和周哥昨晚去了嶺南排練後，回到執事室繼續開工，一做就做到今朝五點鐘，真的辛苦了他們，願主使他們今天有好的精神表現，使一切機件都聽聽話話。

感謝主！除了一些咪有小毛病，一切都算十分順利，獻唱、見證和話劇都好感人，加上音樂和詩歌的配合，全場有許多人亦有感動。

日期：十二月二十二日（星期五）

明天就是福音聚會，但爸爸、周哥（真的有義氣，請假來幫手）和Shadow姐，仍繼續努力地製作見證那部份。

今天歐醫師（效斌）亦來了，亞金（黎帶金姊妹）和細碼（司徒文浩姊妹）都有同一問題問他，亞金話自己經常發燒燒到一○八度，細碼覺得沒有可能的，她們就請教歐醫師，他回答她們燒到一○八度！？相信那人已經死了，根本沒有可能的。亞金說自己睇到支探熱針明明是一○八度，豈有會錯呢？歐醫師說她看錯了，應是一百度八，不是一百零八度呀！原來亞金一直都看錯了。

本來要我跟進的那部份，培哥已交給爸爸跟進，我覺得這樣會比較好，由頭到尾都由爸爸和周哥負責，就不會太混亂，我亦不用調聚會來遷就福音聚會，所以爸爸要今晚要與培哥起製作福音那部份的影片，盼望他們不用開夜趕工喇。

日期：十二月二十一日（星期四）

我回到執事室時，看見裡面多了一位弟兄正處理 Power Point 見證，他就是我的舊同學周哥（周健文弟兄），看見他對 Power Point 的操作非常純熟，原來他讀書時，經常都要用它去做功課，所以都有番兩度散手。

日期：十二月二十日（星期三）

今天開始處理一份《榮上加榮的人生》，另外要執埋場刊一些手尾，而爸爸、培哥和 Shadow 姐繼續處理 Power Point 福音見證。 歐效斌弟兄亦努力地練習他所負責的環節，在與他傾談中，不但聽到美妙的結他旋律，還使我更了解電子琴 Midi Output 的功能。盼望神堅立他們所作的工，他們所作的工願神堅立。

日期：十二月十九日（星期二）

降生節福音聚會越來越接近，負責的弟兄姊妹密鑼緊鼓地排練要演出的項目，而我負責打福音聚會的場刊，盼望主繼續祝福幕前幕後的工作，更要祝福當日在場的新朋友能清楚明白福音，接受主，信得堅穩。

日期：十二月十八日（星期一）

降生節快樂！今天我們開始佈置屯門南光樓聚會處，好有 Christmas Feel 呀！另外，我今天終於做起了《詩篇概略　　卷四》，感謝主！

爸爸（鄭善業弟兄）正處理 23/12/2000 的 Power Point 見證，這都算是一種新嘗試，過往因為很難控制弟兄姊妹講見證的時間，經常 Over Run，今次將見證錄音，到時就播出來，這樣不會再超時啦！不過要多些為各負責的弟兄姊妹和那些器材代禱，而士培哥要去「閉關」預備 24/12/2000 所要講的福音，記住為他禱告呀！

盼弟兄姊妹一同奮力禱告，努力邀約，全區總動員，各按各職。另外福音聚會的每一部份內容，包括領詩、遊戲、舞台劇、VCD、福音、場務……都是十分重要的，盼弟兄姊妹代禱記念。 安排如下
23/12/2000(星期六下午)領詩遊戲：徐錦賢弟兄、司徒雪寶姊妹
福音：姚梅英姊妹
對象：主要是學生、大專

24/12/2000(星期日上午)領詩遊戲：莫相如弟兄、莫艷萍姊妹(Ide)
福音：梁士培弟兄
對象：主要是上班人仕、成人

日期：十二月十五日（星期五）

噢！今天還是做不起《詩篇概略》，尚欠第一○六篇，不過下星期將要攪 23, 24/12/2000 嶺南福音聚會的事前工作，你們有沒有看過那張海報呢？【請按此】，請多多為聚會和每個負責的弟兄姊妹代禱呀！

一有事想提一提弟兄姊妺，請勿向執事室同工外借執事室之文具，這樣會帶給同工們在工作上的不便，盼望各弟兄姊妹見諒。

日期：十二月十四日（星期四）

士培哥哥十分有快的手筆，實在要多謝許多弟兄姊妹背後的禱告，我打字都沒有他寫文字那麼快，另外，士培哥亦努力學習英文打字，盼望可以回覆弟兄姊妹的電郵，所以我真的要繼續努力，現在我趕緊一份《詩篇概略　　卷四》，明天應該可以起貨。

今天執事室裡面真是熱鬧，因為有些少年團同工在努力地製作 Power Point 、錄音和場刊，就是為了今晚那個大Show全少年團感恩聚會。在製作過程中，不單只可以看到少年團同工們的經典相片，而我們大家都有一同感，每當我們越趕工的時候，那些電腦就越唔聽話，真是浪費人家的青春。

日期：十二月十三日（星期三）

屯門執事室事件簿終於開鑼，此事件簿主要寫下本人在執事室中所發生的事，包括代禱事項、文字進度、生活趣事……。

信心旅程 Faith-On Journey

豐盛旅程 Riches Journey

書卷概略──詩篇卷四

牧養我羊──《初信聚會指引》

窯匠的手──《默想聖經人物》